Шмат каму з чытачоў падабаецца рубрыка «Па сакрэту ўсяму свету». У гімназіі вырашылі таксама распавесці пра свае навіны. Адбываецца ж шмат чаго цікавага! Напрыклад…
МАРАФОН
Інтэлектуальны марафон сярод вучняў розных класаў праходзіць штогод. Усім падабаецца ў ім удзельнічаць. Нядаўна на лінейцы ўручылі дыпломы вучням-пераможцам. Асобна адзначылі ўдзельнікаў конкурсу «Казачны сундучок», дзе трэба было адказваць на пытанні, нібы ў віктарыне. За «Сундучок» узнагародзілі Дашу ВЯРБІЦКУЮ, Мішу ГАЛУБІХІНА, Віку ПАРХАЧОВУ, Арцёма БЕЛАКАБЫЛАВА, Пашу ПАРФЯНОВІЧА і Улада БОРБУТА.
НА ДЫСТАНЦЫІ
Нашы вучні паспяхова ўдзельнічалі ў дыстанцыйных алімпіядах па рускай і беларускай мовах. Асабліва вызначыліся сёмы і восьмы класы. Віка ДАЎЦЯН, Насця ГАЙДУК, Вераніка КАЛЕСНІК, Аня ЛАГУЦКАЯ, Насця ЖЫГІМОНТ атрымалі дыпломы за выдатныя веды.
ШОСТЫ АБО ДЗЕСЯТЫ — ХТО ВЕСЯЛЕЙШЫ?
Паміж класамі з пятага па дзесяты прайшоў гімназічны конкурс Клуба вясёлых і знаходлівых. Усе доўга і актыўна рыхтаваліся, пераглядзелі шмат касет і дыскаў з тэлевізійнымі выступленнямі лепшых КВНаўскіх каманд розных гадоў. Перамог дзесяты клас. На другім месцы — шасцікласнікі. У іх ёсць шанцы ў будучым стаць самымі вясёлымі і знаходлівымі ў гімназіі! А трэцяе месца занялі вучні восьмага класа.
ЯШЧЭ Б КРЫШАЧКУ!..
Гімназія ўздельнічала ў конкурсе Юных інспектараў дарожнага руху. Нашымі сапернікамі былі каманды з сямі школ. Нам падабалася не толькі самім удзельнічаць. Мы з захапленнем назіралі за выступленнямі іншых. Давялося здаваць і медыцынскую падрыхтоўку, і правілы дарожнага руху, дэманстравалі свае відэаролікі і нават ездзілі на веласіпедах падчас конкурсу. Першымі сталі смілаўчане, а нам, на жаль, крышачку не хапіла вязення, каб перамагчы!.. Але нічога, мо, ў наступным годзе пашанцуе.
ХОЧАШ-НЕ ХОЧАШ
Як толькі сышоў снег, мы пачалі добраўпарадкоўваць тэрыторыю вакол гімназіі. Спачатку, праўда, не вельмі хацелася працаваць, але потым пакрыху ўцягваешся ў работу, а з сябрамі-аднакласнікамі дык і наогул весялей любая справа!
Калі нядаўна ў гімназіі быў суботнік, прыйшлі на яго ўсе класы. Так старанна прыбралі гімназію, што зараз яна проста прыгажуня!
Даша ЦЯРЭШКА, 12 гадоў,
Міша ГАЛУБІХІН, вучні 6 класа гімназіі,
удзельнікі гуртка «Юны журналіст»
Чэрвеньскага Цэнтра дзіцячай творчасці
