Здаецца, зусім нядаўна ішлі падрыхтоўчыя работы да пачатку выхаду ў поле, пачыналіся засеўкі, а вось ўжо да пазначанага тэрміну завяршэння сяўбы яравых зерневых і зернебабовых застаўся тыдзень. Амаль усе гаспадаркі набіраюць тэмпы веснавых палявых работ, вядуць іх у комплексе. Цішыня і спакой адчуваюцца толькі на палетках філіала СГК «Велікаполле».
Як зазначае вядучы аграном упраўлення сельскай гаспадаркі і харчавання Аляксандр Піпчанка, гэтая гаспадарка практычна да пасяўной яшчэ не прыступала. Па стану на 12 красавіка тут было падкормлена толькі 2 працэнты азімых зерневых, у той час як па раёну гэты паказчык складаў 71 працэнт. Ніводнага гектара азімых не падсеяна шматгадовымі травамі, а цяпер упускаюцца тэрміны падсеву яравых. У выніку немалыя грошы, за якія было набыта насенне шматгадовых траў, могуць быць выкінуты на вецер.
З вялікім спазненнем таксама ўключылася гаспадарка ў работу па падрыхтоўцы глебы, спасылаючыся на тое, што палеткі яшчэ не вызваліліся ад вільгаці. Акрамя таго, не падтрымліваецца культура палеткаў. На іх побач з дарогай на Горкі, бы гарох, рассыпаны камяні розных памераў.
Прычына ўсіх гэтых недапрацовак, на думку Аляксандра Піпчанкі, у бессістэмнай рабоце з людзьмі, адсутнасці арганізацыйных мерапрыемстваў па падрыхтоўцы да сяўбы і як вынік, несвоечасовая падрыхтоўка тэхнікі, а адсюль — і прамаруджванне ў тэмпах сяўбы.
У гаспадарцы яравы клін невялікі — усяго 260 гектараў, і яна лепш за іншых забяспечана тэхнікай, якой можна завяршыць пасяўную за 5 дзён, але пры такой арганізацыі работ разлічваць на своечасовае і якаснае правядзенне веснавой кампаніі пакуль немагчыма.
Не можа парадаваць сёння СГК «Велікаполле» і паказчыкамі ў жывёлагадоўлі, якія напрамую залежаць ад раслінаводчай галіны. Па словах намесніка начальніка ўпраўлення па жывёлагадоўлі Віктара Ляснеўскага, на 1 красавіка ў гаспадарцы заставалася толькі 0,8 цэнтнера кармавых адзінак на умоўную галаву жывёлы. Гэтага дастаткова для бесперабойнага кармлення на працягу трох дзён. Таму цяпер вымушаны купляць кукурузны сілас у ААТ «Райаграсервіс», ПСГ «Дамавіцкі», а таксама зернефураж, якога ў гаспадарцы засталося ўсяго 20 тон. З-за недахопу ўласных кармоў неаднаразова здараліся збоі ў рацыёне кармлення, што станавілася асноўнымі прычынамі сістэматычнага недаатрымання валавага надою і зніжэння рэалізацыі малака ў параўнанні з мінулым годам. На гэта ўплывалі таксама недапрацоўкі ў рабоце ветэрынарнай і заатэхнічных служб па ўзнаўленню статку.
На 1 красавіка ў гаспадарцы ў параўнанні з мінулым годам недаатрымана 16 цялят. Сельгаспрадпрыемства прыняло захады па павелічэнню статку. На сённяшні дзень у наяўнасці ёсць 420 галоў буйной рагатай жывёлы — на 18 больш мінулагодняга. Але належныя ўмовы для іх ўтрымання адсутнічалі. Таму гаспадарка мае адзін з самых нізкіх валавых надояў малака ў раёне.
Не вырашаюць на належным узроўні ў СГК «Велікаполле» і кадравыя пытанні. На цяперашні момант тут няма ветурача, заатэхніка, не хапае мясцовых рабочых, таму на палявых і жывёлагадоўчых работах задзейнічаны жыхары суседніх вёсак Ляды і Горкі, а таксама Чэрвеня.
Поспех кожнага калектыву залежыць ад умелага кіраўніцтва. Толькі там, дзе належная выканаўчая і тэхналагічная дысцыпліна, існуе сістэма ў рабоце з кадрамі, дакладная арганізацыя працы ва ўсіх галінах, можна сказаць, што кіраўнік на сваім месцы. А гэта значыць — можна чакаць добрых вынікаў.
Людміла РАБЕЦКАЯ
