Смілавічы на працягу двух дзён прымалі першую абласную спартакіяду навучэнцаў сельскагаспадарчых устаноў адукацыі, якую арганізаваў Мінскі абкам прафсаюза работнікаў аграпрамысловага комплексу.
Спаборніцтвы прайшлі ў аграрным каледжы і сельгасліцэі. 19 каманд вызначалі мацнейшых у валейболе, міні-футболе, настольным тэнісе, лыжных гонках і мнагабор’і «Здароўе». Акрамя таго, старшыні вучнёўскіх прафсаюзных камітэтаў спаборнічалі ў дартсе, выкладчыкі фізвыхавання — у стральбе з пнеўматычнай вінтоўкі.
Чэрвеньшчыну на спартакіядзе прадстаўлялі тры каманды — Смілавіцкіх сельскагаспадарчага ліцэя і аграрнага каледжа, а таксама Чэрвеньскага будаўнічага ліцэя. Найбольш удала выступілі смілавіцкія ліцэісты. У трох з чатырох заліковых відаў праграмы яны занялі прызавыя месцы: другія — па міні-футболе і мнагабор’і «Здароўе», трэцяе — па лыжных гонках. У выніку каманда стала сярэбраным прызёрам спартакіяды, прапусціўшы наперад толькі прадстаўнікоў Маладзечанскага прафесійна-тэхнічнага каледжа. Крыху не дацягнулі да прызавой «тройкі» спартсмены Смілавіцкага дзяржаўнага аграрнага каледжа. У іх — чацвёртае месца ў агульнакамандным заліку.
Кіраўнік кафедры фізвыхавання Смілавіцкага сельгасліцэя Павел Дзяркач, які, дарэчы, сам выйграў спаборніцтвы па стральбе з пнеўматычнай вінтоўкі, застаўся задаволены выступленнем сваёй каманды.
— У спаборніцтвах па міні-футболу, якія праходзілі ў нашай спартыўнай зале, не абышлося без долі шанцавання: не дарэмна ж кажуць, што родныя сцены дапамагаюць. Наша каманда трапіла не ў мацнейшую групу, што дало магчымасць выйграць абедзве сустрэчы і выйсці ў фінальную частку турніру. А ў фінале хлопцы паказалі характар: пасля пройгрышу футбалістам з Клецка здолелі настроіцца на прынцыповую гульню з Дзяржынскам, перамаглі і сталі другімі сярод дзевяці каманд.
Другое месца Наталлі Агейчык і годнае выступленне Андрэя Бакуновіча ў мнагабор’і, добрыя вынікі Андрэя Мігеля і Марыны Насуты ў лыжных гонках сталі вырашальнымі ў барацьбе за п’едэстал у агульнакамандным заліку спартакіяды.
За паспяховым выступленнем каманды — спрыяльныя ўмовы падрыхтоўкі да спаборніцтваў пры ўсебаковай падтрымцы адміністрацыі ліцэя і раённай арганізацыі прафсаюза работнікаў АПК. А таксама тое, што заняткі фізічнай культурай і спортам — адзін з важнейшых прыярытэтаў вучэбна-выхаваўчай работы ў нашай установе…
А вось як пракаментаваў вынікі спартакіяды старшыня абкама прафсаюза работнікаў аграпрамысловага комплексу Андрэй Някрэвіч:
— Мерапрыемства прайшло арганізавана. За гэта вялікі дзякуй гаспадарам — Смілавіцкім аграрнаму каледжу і сельскагаспадарчаму ліцэю. Асобная ўдзячнасць — старшыні Чэрвеньскай раённай арганізацыі прафсаюза работнікаў АПК Тамары Сакалоўскай, якая непасрэдна займалася падрыхтоўкай спартакіяды. Прыемна, што гэтыя спаборніцтвы сталі першымі такога кшталту не толькі на Міншчыне, але і ў рэспубліцы.
Водгукі пра спартакіяду ад яе ўдзельнікаў станоўчыя. Усе, з кім давялося абмяняцца думкамі, у адзін голас гавораць, што такія мерапрыемствы трэба праводзіць і ў далейшым. І мы гэта абавязкова будзем рабіць. Магчыма, перанясём спартакіяду на цёплы перыяд года, бо сёлета тым жа лыжнікам было не дужа камфортна спаборнічаць з-за моцнага марозу.
А яшчэ спартакіяда вызначылася цудоўнымі канцэртам і дыскатэкай, якія наладзілі для ўдзельнікаў у каледжы, добрым харчаваннем, утульнымі ўмовамі пражывання.
Словам, спадзяюся, што разам з кубкамі, медалямі і грашовымі прэміямі, якія атрымалі ад нас пераможцы і прызёры спартакіяды (а практычна кожная з каманд мела поспехі ў тым ці іншым відзе спаборніцтваў) нашы навучэнцы павезлі дахаты ўзнёслы настрой, незабыўныя ўражанні і ўспаміны…
Ігар АДАМОВІЧ. Фота аўтара
