Сёння змагацца за званне лепшых у лесапарку “Загор’е” сабраліся каманды з 16 прадпрыемстваў, арганізацый і ўстаноў раёна.
Адкрываючы мерапрыемства, начальнік раённага аддзела па надзвычайных сітуацыях Вячаслаў Саўковіч (на здымку) адзначыў, што менавіта гэтыя спаборніцтвы паказваюць ступень падрыхтоўкі грамадскіх фарміраванняў да дзеянняў у надзвычайнай сітуацыі. Ён пажадаў поспехаў і ўдачы ўсім камандам.
У складзе судзейскай калегіі — галоўны суддзя спаборніцтваў, загадчык паліклінікі Чэрвеньскай раённай бальніцы Таццяна Губарэвіч; суддзі — Сяргей Каўзуновіч, старшы інжынер раённага аддзела па надзвычайных ситуацыях; Кірыл Маскалёў, начальнік паста №11 в.Горкі; Валянціна Ніціеўская, загадчык стаматалагічнага аддзялення Чэрвеньскай раённай бальніцы; Наталля Тарнапольская, памочнік урача-эпідэміёлага Чэрвеньскага раённага цэнтра гігіены і эпідэміялгіі; сакратарыят судзейскай калегіі – Наталля Сычова, галоўная медыцынская сястра раённай бальніцы і Лілія Кудзелка, старшая медыцынская сястра паліклінікі.
Кожная каманда прадставіла на спаборніцтвы Дзённік санітарнай дружыны або звяна. У ім – схема апавяшчэння асабовага саставу санітарнай дружыны ў нерабочы час, ведамасць замацавання маёмасці, пратакол праверачных заняткаў, план падрыхтоўкі, абавязкі асабовага саставу, пералік укладанняў у санітарную сумку, прыкладны табель аснашчэння санітарнага фарміравання грамадзянскай абароны сродкамі аховы і журнал вытворчага навучання.
На першым этапе праводзіўся агляд экіпіроўкі, аснашчэння, правяралася ўменне імі карыстацца. На другім – каманды дэманстравалі свае навыкі аказання неадкладнай дапамогі ў камбінаваным ачагу паражэння, паказвалі тэарэтычныя веды. На трэцім этапе неабходна было паказаць веды і ўменні дзейнічаць у ачагу бактэрыялагічнага і інфекцыйнага паражэння.
Добраахвотныя пажарныя дружыны спаборнічалі ў баявым разгортванні. Усе каманды падрыхтавалі баявыя лісткі і нумары мастацкай самадзейнасці.
Пераможцамі сталі: сярод санітарных дружын – санітарная дружына эксперыментальнай базы “Натальеўск”, другое месца заняла каманда Чэрвеньскага вытворча-харчовага завода, трэцяе – санітарная дружына з Чэрвеньскага лясгаса. Сярод санітарных звёнаў – першымі было звяно СВФ “Аграбуд” ААТ “Мінскжалезабетон”, на другім месцы – звяно ААТ “Рыбгас “Волма”, на трэцім – звяно Смілавіцкага сельскагаспадарчага прафесійнага ліцэя.
Лепшай добраахвотнай пажарнай дружынай прызнана дружына ўпраўлення па адукацыі, спорту і турызму Чэрвеньскага райвыканкама. Другое месца заваявала пажарная дружына ААТ “Раванічы”, трэцяе – ААТ “Валевачы”.
Лепшым баявым лістком прызнаны баявы лісток, аформлены сандружынай філіяла КУП “Мінскаблдорбуд”- ДРСУ-121”. У конкурсе мастацкай самадзейнасці лепшай была каманда Смілавіцкага аграрнага каледжа.
Усе пераможцы атрымалі Дыпломы Чэрвеньскага раённага аддзела па надзвычайных сітуацыях.
Таццяна МАРЦЬЯНАВА. Фота аўтара