У сераду старшыня Чэрвеньскага райвыканкама Віталь Казлоў правёў асабісты прыём грамадзян. У сваёй большасці людзей хвалявалі зямельныя пытанні, утрыманне дарог і добраўпарадкаванне тэрыторый.
Жыхар Чэрвеня паскардзіўся на падтапленне свайго двара:
– Калі прыбралі гаражы па вуліцы Урыцкага, за будынкам музея, вада з цэнтра горада бяжыць пад мой дом і агарод. Амаль месяц такая сітуацыя назіраецца.
Наведнік прапануе і рашэнне праблемы: на нізіну, якая ўтварылася пасля зносу гаражоў, падсыпаць пяску.
З зямельным пытаннем да старшыні райвыканкама звярнуўся прадстаўнік фермерскай гаспадаркі, якая займаецца вытворчасцю рулоннага газона (на здымку):
— Ёсць ідэя павялічыць аб’ёмы вытворчасці з пашырэннем спектру дзейнасці і стварэннем новых працоўных месцаў. Пакуль мы выпускаем тавары народнага спажывання, больш для ландшафтных работ і добраўпарадкавання тэрыторый. Каб пачаць вытворчасць спартыўнай прадукцыі, якая адпавядае патрабаванням Саюза еўрапейскіх футбольных асацыяцый (УЕФА), патрэбна пяціпольная сістэма вытворчасці рулоннай дзярніны і закупка спецыяльнага абсталявання. Расійская кампанія гатова ў нас інвеставаць. Для пяціпольнага ж сяўбазвароту фермерскай гаспадарцы дадаткова неабходна мінімум 15 га зямлі.
Старшыня садовага таварыства «Сонейка» паскардзілася падчас прыёму грамадзян на наступствы моцных вятроў: дрэвы, якія не вытрымалі націску прыроднай стыхіі, пашкодзілі бетонныя слупы і агароджы.
— У нас у садовым таварыстве засталіся адны пажылыя жанчыны, дзеці на дачу прыязджаюць толькі адпачыць. Калі каго і прыцягнуць на працы – трэба плаціць, – гаворыць яна.
Па яе словах, дарога да садовага таварыства таксама патрабуе рамонту.
Усяго на прыём да старшыні райвыканкама прыйшлі 9 чалавек. Віталь Казлоў даручыў адпаведным службам разабрацца ў сітуацыях, у тым ліку з выездам на месца, і вырашыць усе пытанні ў рамках дзеючага заканадаўства.
Сняжана КАЎГАРЭНЯ, фота аўтара
