У 80-гадовы юбілей з дня ўтварэння сталічнага рэгіёну 15 студзеня ў аблвыканкаме ўшаноўвалі прадстаўнікоў розных сфер дзейнасці, якія ўнеслі значны ўклад у развіццё Міншчыны. Высокіх узнагарод удастоены і тры жыхары Чэрвеньскага раёна. Ганаровай Граматай Савета Міністраў узнагароджаны дырэктар адкрытага акцыянернага таварыства “Рыбгас “Волма» Аляксандр Кулікоўскі, Ганаровай Граматай Нацыянальнага сходу Рэспублікі Беларусь — дырэктар Цэнтра творчасці дзяцей і моладзі гарадскога пасёлка Смілавічы Ала Лаўрыновіч, Ганаровай Граматай Мінаблвыканкама — урач-хірург, загадчык хірургічнага аддзялення Цэнтральнай раённай бальніцы Аляксандр ДОЎГАЧ.
Мерапрыемствы з нагоды 80-гадовага юбілею Міншчыны працягваліся ў Палацы Рэспублікі, куды на ўрачысты сход і святочны канцэрт прыбылі дэлегацыі з усіх раёнаў сталічнага рэгіёну. Прысутнічалі таксама прадстаўнікі Адміністрацыі Прэзідэнта Беларусі, урада, парламента, духавенства, кіраўнікі дыпламатычных місій, грамадскіх арганізацый, дзеячы навукі і культуры, ганаровыя грамадзяне Мінскай вобласці, ветэраны Вялікай Айчыннай вайны і ветэраны працы, перадавікі вытворчасці, госці з Грузіі і Малдовы.
На ўрачыстым сходзе намеснік старшыні Палаты прадстаўнікоў Нацыянальнага сходу Баляслаў Пірштук уручыў старшыні Мінаблвыканкама Анатолю Ісачанка Ганаровую Грамату Нацыянальнага сходу, якой Мінская вобласць удастоена за вялікі ўклад у развіццё сацыяльнай і эканамічнай палітыкі краіны.
У прывітальным слове губернатар адзначыў, што ратны і працоўны подзвіг Міншчыны ацэнены па годнасці: вобласць двойчы ўзнагароджана ордэнам Леніна і два разы ёй прысуджаўся Ганаровы дзяржаўны сцяг Рэспублікі Беларусь.
З юбілеем сталічны рэгіён таксама павіншавалі старшыня Мінгарвыканкама Андрэй Шорац, дзяржаўны сакратар Савета бяспекі Станіслаў Зась. Віншавальныя тэлеграмы і вітальныя адрасы паступалі ў аблвыканкам на працягу ўсяго святочнага дня.
У фае Палаца Рэспублікі працавала выстава дасягненняў народна-гаспадарчага комплексу вобласці, у тым ліку прадукцыі прамысловых прадпрыемстваў, а таксама фотавыстава БЕЛТА «Міншчына: учора і сёння».
Сняжана КАЎГАРЭНЯ. Фота аўтара