Гэты старадаўні абрад правялі надвячоркам у пятніцу на ўскрайку палетка пры ўездзе ў вёску Красны Дар, дзе восем камбайнавых экіпажаў пачалі абмалот азімай пшаніцы.
Падчас “Зажынак” гучалі жніўныя песні і вершы ў выкананні самадзейных артыстак мясцовых устаноў культуры. Жанчыны сярпамі зжалі першы сноп новага ўраджаю. Як сімвал дабрабыту і заможнасці, яго ўручылі дырэктару ААТ “Раванічы” Сяргею Кіпецю.
Кіраўнік гаспадаркі, а таксама старшыня райкама прафсаюза работнікаў аграпрамысловага комплексу Ларыса Ефіменка пажадалі хлебаробам моцнага здароўя і добрых намалотаў.
Паводле слоў Сяргея Кіпеця, сёлета тут разлічваюць павялічыць валавы збор збожжа ў параўнанні з мінулагоднім на 2-5 працэнтаў. Завяршыць абмалот зерневых плануецца да 20 жніўня.
Як распавяла старшыня прафкама гаспадаркі Тамара Цітавец, калектыў мясцовых хлебаробаў – сплаў вопыту і маладосці. Маладзёжнымі з’яўляюцца чатыры з васьмі збожжаўборачных экіпажаў. А самы старэйшы – кавалер двух ордэнаў Працоўнай Славы Аляксандр Іосіфавіч Маслоўскі. Нягледзячы на пенсійны ўзрост, падчас жніва ён сядае за штурвал камбайна.
Ігар АДАМОВІЧ. Фота аўтара
