Ёсць у пісьменніка Антуана дэ Сент-Экзюперы выдатная цытата з «Маленькага прынца»: «Встал поутру, умылся, привел себя в порядок — и сразу же приведи в порядок свою планету».
Дзіўна, наколькі па-рознаму людзі адносяцца да сваіх дамоў і прылеглых тэрыторый. У некаторых бур’ян і бруд «гаспадараць», у іншых — дагледжана, прыбрана. Гэта тычыцца не толькі прыватных падворкаў, але і арганізацый. Так, пра адметнасці псіханеўралагічнага Дома-інтэрната для дарослых, што знаходзіцца паблізу вёскі Язоўкі, ужо пісалася ў «Раённым весніку». На гэтай тэрыторыі можна ўбачыць шмат прыгожага, зробленага чалавечымі рукамі. І арыгінальныя кампазіцыі, і возера, і разнастайнасць кветак! Але ж не кожны жадаючы можа запраста туды папасці — закрытая тэрыторыя. Таму работнікі і жыхары Дома-інтэрната пасля заканчэння ўборачнай робяць з саломы розныя кампазіцыі па-за межамі двара. Сёлета тут можна ўбачыць селяніна на трактары «Беларус», стажок і вясёлую матрошку. Нельга не ўсміхнуцца, гледзячы на іх. Каля гэтага забаўляльнага хараства не прыпыняецца, мусіць, толькі той, хто спяшаецца. Людзі не толькі любуюцца, але і фатаграфуюць, каб паказаць другім такі цуд. Цікава, што падобнае можна сустрэць, у асноўным, на палетках краіны, праязджаючы па дарозе. Хочацца сказаць дзякуй за арыгінальнасць стваральнікам гэтай кампазіцыі. Пабольш бы такіх добраўпарадкаванняў на Чэрвеньшчыне!
Кацярына ШУМКО.
Фота аўтара
