Ужо каторую суботу запар зранку жыхары Чэрвеня спяшаюцца на плошчу Свабоды, дзе адбываюцца кірмашы. З вёсак прыязджаюць машыны з гароднінай і бульбай, рыбай, мясам. Не толькі з нашага раёна, але і фермеры Міншчыны і Брэстчыны наведваюцца ў Чэрвень са сваёй прадукцыяй. Выстаўляе гандлёвыя палаткі і мясцовае спажыўтаварыства. Набываюць практычна ўсё: капусту, моркву, цыбулю, буракі, перац, памідоры…
Словам, гандаль ідзе поўным ходам. Адчуваецца, што запаслівыя жыхары грунтоўна рыхтуюцца да зімы. Часцей гэта людзі сталага і пажылога ўзросту. Праўда, часам заўважала сярод пакупнікоў і маладыя сем’і. Вядома, цяпер, у перыяд распродажу, набыццё гародніны абыходзіцца значна таней, і гэта выгадна ўсім, хто хоча зэканоміць грошы.
Кірмашы ў Чэрвені і Смілавічах будуць доўжыцца да 18 лістапада.
Эма МІКУЛЬСКАЯ. Фота аўтара