У мінулыя выхадныя ля вёскі Раванічы жыхар Мінска ўпаляваў дзіка. Пры лабараторным даследаванні мяса жывёлы былі выяўлены ўзбуджальнікі цяжкага захворвання — трыхінілёзу. Паводле звестак раённага Цэнтра гігіены і эпідэміялогіі, да праверкі гэтае мяса ў ежу не ўжывалася.
Выпадкі заражэння людзей трыхінілёзам, які можа прывесці да цяжкіх наступстваў для здароўя (напрыклад, паралічу дыхальных шляхоў) і нават смерці, рэгіструюцца ў Беларусі практычна штогод. У прыватнасці, летась былі зарэгістраваны дзве ўспышкі гэтай хваробы — у Маладзечанскім і Гродзенскім раёнах.
Каб засцерагчыся ад трыхінілёзу, медыкі раяць абавязкова правяраць у лабараторыі мяса дзікай і вырашчанай на ўласных падвор’ях жывёлы (галоўным чынам — свіней). Таксама неабходна выконваць правілы тэрмічнай апрацоўкі і замарожвання мяса, прадуктаў з яго.
Ігар АДАМОВІЧ