На анлайн-рэсурсе “Небяспечная прадукцыя” паведамляецца аб увядзенні забароны на ўвоз і рэалізацыю на тэрыторыі Рэспублікі Беларусь двух тавараў, пастаўшчыкамі якіх з’яўляецца адна з фірмаў, зарэгістраваных у Чэрвеньскім раёне. Прычына – неадпаведнасць патрабаванням тэхнічных рэгламентаў Мытнага саюза.
Падчас праведзеных выпрабаванняў выяўлена, што ў склад карамелі ледзянцовай “Манпанс’е” вытворчасці ТАА «Кандытрэйд» (Расійская Федэрацыя, Краснадарскі край, горад Армавір) уваходзяць сінтэтычныя фарбавальнікі тартразін (Е102), сонечны заход (Е110) і чароўны чырвоны (Е129), а ў склад міні-пернікаў з начынкамі вытворчасці ІП Князева С.Б. (Расійская Федэрацыя, горад Варонеж) – сінтэтычны фарбавальнік понса 4R (Е124). Пры гэтым на абодвух таварах адсутнічае папераджальны надпіс “Змяшчае фарбавальнікі, якія могуць аказваць адмоўны ўплыў на актыўнасць і ўвагу дзяцей”.
Анлайн-рэсурс “Небяспечная прадукцыя” ўтрымлівае інфармацыю аб прадукцыі, забароненай да ўвозу і (або) абарачэння на тэрыторыі Рэспублікі Беларусь, а таксама рэестр дакументаў аб ацэнцы адпаведнасці прадукцыі патрабаванням тэхнічных рэгламентаў Еўразійскага эканамічнага саюза (Мытнага саюза), дзеянне якіх спынена на тэрыторыі Рэспублікі Беларусь.
У адпаведнасці з Указам Прэзідэнта Рэспублікі Беларусь «Аб мерах па забеспячэнню дзяржаўнага кантролю (нагляду) за выкананнем патрабаванняў тэхнічных рэгламентаў» Дзяржаўным камітэтам па стандартызацыі Рэспублікі Беларусь праводзяцца мерапрыемствы па выяўленню небяспечнай прадукцыі і выдачы прадпісанняў аб спыненні (прыпыненні) дзеяння на тэрыторыі Рэспублікі Беларусь дакументаў аб ацэнцы адпаведнасці такой прадукцыі патрабаванням тэхнічных рэгламентаў Мытнага саюза, Еўразійскага эканамічнага саюза.
