Сёння па народнаму календару – Пакровы. Нашы продкі лічылі: якое надвор’е на Пакровы, такое будзе і ўсю зіму да вясны.
Такасама казалі:
– калі да Пакрова дня снег не пакрые зямлю, то і на Каляды не будзе снегу;
– калі да Пакроў не было снегу, не будзе яго яшчэ два тыдні;
– калi снег да Пакроваў пойдзе – зiма будзе не хутка;
– калі да Пакроваў жоравы адляцяць – зiма будзе ранняя i халодная;
– калi лiсце з дуба i бярозы на Пакровы ападзе чыста – да лёгкага года, а не ападзе – да халоднай зiмы.
Асабліва ж уважліва на Пакровы сачылі за ветрам: з якога ён боку быў у гэты дзень, з таго боку ён павінен дзьмуць і ўсю бліжэйшую зіму. Зыходзячы з таго пераканання, што поўдзень заўсёды нясе цяпло, а поўнач – холад, сцвярджалі, што паўночны пакроўскі вецер прадказвае суровую зіму, а паўднёвы – мяккую, гнілую. Калі ж з раніцы задзьме ўсходні вецер – зіма будзе маласнежная, заходні – наадварот, вельмі снежная.
Сёння – незвычайны для Пакроваў дзень. На дварэ – каля 20 градусаў цяпла, вецер – паўднёва-заходні. Калі народныя прыкметы спраўдзяцца, то зіма будзе цёплая і снежная, але да Калядаў снегу чакаць не варта.
