Футбол. Чэмпіянат Мінскай вобласці. Група «А». 4 тур
25 мая. Барысаў. Стадыён СДЮШАР. Сонечна. 29 градусаў. 20 гледачоў.
«Колас»: Курыловіч, Петрусевіч, Рысянкоў, Сасункевіч, Лаўрык, Цэдрык (Прытыка, 46, Качановіч, 80), Палтаржыцкі, Немагуцін (Суша, 73), Шалабнёў, Міцкевіч (Шмідаў, 65), Масько (Слыхоўскі, 73).
Пякельная гарачыня, нязвыклы для чэрвеньцаў штучны газон, статус лідара спаборніцтваў у гаспадароў поля — усё паказвала на тое, што нашым футбалістам будзе ў гэтай сустрэчы вельмі нялёгка. Так і сталася.
Барысаўчане большую частку першага тайма гаспадарылі на палове «Коласа», зрэдку дазваляючы контратакаваць. Выкарыстай чэрвеньцы тую пару-тройку зручных момантаў засмуціць варатара ФК «Барысаў», невядома, як бы разгортваліся падзеі на полі далей. Аднак гэтага не здарылася. А вось у нашых варотах у сярэдзіне тайма мяч пабываў — 0:1.
Пасля перапынку барысаўская каманда гуляла, як кажуць, па ліку, не дужа ірвучыся наперад. І ў «Коласа» з’явіўся шанц на выратаванне. Моманты для таго, каб параўнаць лік былі. Дастаткова ўзгадаць праход Юрыя Немагуціна па леваму краю атакі і дакладную перадачу ў штрафную пляцоўку на Віталя Палтаржыцкага. Пасля ўдару апошняга мяч цудам размінуўся з варотамі.
Адным з ключавых эпізодаў матча, які мог паўплываць на яго зыход, стала спрэчнае рашэнне суддзі, калі сапернік па-хамску ўдарыў па нагах Віталя Палтаржыцкага пасля спынення гульні. У трох папярэдніх турах арбітры за падобныя парушэнні выдалілі чатырох ігракоў «Коласа». А тут суддзя не наважыўся пакінуць барысаўчан удзесяцёх: грубіян атрымаў толькі жоўтую картку. У выніку чэрвеньцы не здолелі хутка супакоіць нервы і неўзабаве прапусцілі выніковую атаку гаспадароў поля — 0:2.
Канцоўка сустрэчы прайшла вяла. Змучаныя спёкай, ігракі абедзвюх каманд ледзь цягалі ногі па гарачай «сінтэтыцы» ў чаканні фінальнага свістка арбітра.
У чым пашчасціла «Коласу», дык гэты ў тым, што нашы суседзі па турнірнай табліцы, акрамя бярэзінцаў, таксама свае матчы прайгралі. Сёння чэрвеньцы згуляюць на сваім полі з «Валожынам-2010». Пачатак — у 16 гадзін.
Вынікі астатніх сустрэч 4 тура: «Валожын-2010» — «Крупкі-ДРБУ-164» — 3:1, «Беразіно» — «Жодзіна-2007» — 3:1, «Маладзечна-ДЮСШ-4» — «Вілія» (Вілейка) — 3:2, «СМІаўтатранс» (Смалявічы) — «Забудова-2007» (Маладзечанскі раён) — 1:2.
Становішча каманд
пасля 4 тураў:
| Каманды | Г | В | Н | П | М | А |
| ФК «Барысаў» | 4 | 4 | 0 | 0 | 14-3 | 12 |
| «Маладзечна-ДЮСШ-4» | 4 | 3 | 0 | 1 | 13-5 | 9 |
| «Забудова-2007» | 4 | 3 | 0 | 1 | 11-6 | 9 |
| «Беразіно» | 4 | 2 | 0 | 2 | 12-5 | 6 |
| «Жодзіна-2007» | 4 | 2 | 0 | 2 | 13-8 | 6 |
| «Вілія» | 4 | 2 | 0 | 2 | 9-6 | 6 |
| «СМІаўтатранс» | 4 | 1 | 1 | 2 | 3-4 | 4 |
| «Колас» (Чэрвень) | 4 | 1 | 1 | 2 | 3-7 | 4 |
| «Валожын-2010» | 4 | 1 | 0 | 3 | 3-20 | 3 |
| «Крупкі-ДРБУ-164» | 4 | 0 | 0 | 4 | 4-23 | 0 |
