Гэтыя здымкі, зробленыя падчас правядзення ў раёне рэспубліканскага суботніка, яскрава сведчаць аб актыўным ўдзеле ў ім шматлікіх калектываў. З добрым настроем ладзілі добрыя справы. Работы хапала ўсім.
Асабліва патрэбны былі рабочыя рукі на добраўпарадкаванні тэрыторыі фізкультурна-аздараўленчага комплексу. Тут працавалі не толькі работнікі райвыканкама на чале са старшынёй Іванам Муха, але і больш за 20 чалавек з Мінскага аблвыканкама, якія прыехалі разам з губернатарам вобласці Сямёнам Шапіра. Яны ўладкоўвалі дарожкі, укладвалі тратуарную плітку і бардзюрны камень…
Больш за 20 калектываў добраўпарадкавалі памятныя месцы, помнікі: фарбавалі, бялілі, высаджвалі кветкі, туі, дрэвы.
Моладзь раёна, члены БРСМ, навучэнцы і школьнікі добраўпарадкоўвалі тэрыторыю маладзёжнага парка. Яны ачышчалі яго ад сухастою і лістоты, уладкоўвалі дарожкі, бялілі дрэвы.
Работнікі жыллёва-камунальнай гаспадаркі прыбіралі сквер, вывозілі бытавое смецце ад шматпавярховак, бялілі бардзюры, фарбавалі будынкі, рамантавалі платы.
Пасля суботніка ўвесь наш раён папрыгажэў, пасвятлеў. Прыемна ўсведамляць, што гэта — вынік нашай агульнай працы і клопату пра месца, дзе мы жывём і працуем.
Па статыстычных дадзеных, у суботніку прынялі ўдзел больш за 10,5 тысячы чэрвеньцаў. У выніку ў агульную скарбонку рабочай суботы зароблена 132,4 мільёна рублёў.
Людміла РАБЕЦКАЯ
