Навядзенне парадку на зямлі — пытанне, якое не мае тэрміну даўніны. Гэта не толькі назва аднайменнай рэспубліканскай праграмы, гэта штодзённы клопат улады ўсіх узроўняў, адказных службаў і канкрэтных гаспадароў.
А што вызначае сапраўднага гаспадара? Тое, як ён адносіцца да самага дарагога, што ў нас ёсць, — да нашай зямлі. Сёлетняя ранняя вясна паспрыяла таму, каб жыхары Чэрвеньшчыны загадзя распачалі работы па навядзенню парадку ў сваіх дварах, прымадавых тэрыторыях. Да гэтай справы цяпер неабходна далучыцца і кожнаму ў грамадскіх месцах, на тэрыторыях прадпрыемстваў, гаспадарак і арганізацый. Родны горад, вёска, як і ўласны дом, патрабуюць пастаяннага клопату, падтрымкі і догляду.
Сёння на Чэрвеньшчыне ладзіцца рэспубліканскі суботнік. Удзел у ім прымаюць калектывы ўсіх устаноў, арганізацый, служб, прадпрыемстваў раёна.
Многія калектывы будуць працаваць на добраўпарадкаванні помнікаў воінаў і партызан, якія загінулі на тэрыторыі раёна. Гэта асабліва актуальна падчас падрыхтоўкі і ажыццяўлення мерапрыемстваў, прысвечаных 70-й гадавіне вызвалення Рэспублікі Беларусь ад нямецка-фашысцкіх захопнікаў і Перамогі савецкага народа ў Вялікай Айчыннай вайне. Толькі на мемарыяльным комплексе «Папова Града», які ўшаноўвае памяць спаленай тут у вайну вёскі разам з жыхарамі, сёння наводзяць парадак больш за 100 чалавек.
У сённяшнім суботніку кожнаму жадаючаму далучыцца да работы на агульную карысць раёна знаходзіцца справа па душы. Хтосьці прыводзіць у парадак закінутыя сядзібы, ліквідуе стыхійныя звалкі, знішчае пустазелле, іншыя працуюць на зборы камянёў, садзяць дрэўцы , кустарнікі кветкі, упарадкоўваюць газоны, клумбы…
Праз некалькі тыдняў клапатлівая маці-прырода пачне аздабляць зямлю першай зелянінай, набяруць моц пасаджаныя дрэвы, кусты, кветкі. І так прыемна будзе ўсведамляць кожнаму, што менавіта яго рукі стварылі навокал такую прыгажосць.
Людміла РАБЕЦКАЯ