Дрэва без гнёздаў
Дрэва, якое не мае птушыных гнёздаў, усёроўна што стары халасцяк: жыве толькі для сябе і не клапоціцца аб прадаўжэнні роду.
Пра малітву
Пачуўшы словы малітвы «Магутны Божа», якая заканчваецца заклікам «Зрабі магутнай, зрабі шчаслівай краіну нашу і наш народ», гэты ўжо немалады чалавек з нездавальненем адзначыў:
— Просить у Бога надо за себя!
— Хіба?! А нас жа ўсё жыццё вучылі: «Раньше думай о Родине, а потом о себе!».
Неабходнасць праверкі
— Як сябе адчуваеце? — пытаецца кабета ў мужчыны сталага ўзросту.
— Цудоўна! — адказвае той.
— Вер, вер, ды правер, — хочацца ўставіць мне слова.
Інфляцыя
На пачатку дзевяностых у Беларусі былі ўведзены свае папяровыя грошы з выявамі тутэйшых звяроў, так званыя «зайчыкі».
Летам 1994 года я пазычыў рэжысёрцы нашага народнага тэатра сто купюраў з выяваю мядзведзя. За гэтыя грошы ў той момант можна было купіць 8 паўлітровых бутэлек гарэлкі (4 літры!). Роўна праз год, калі яна аддала мне гэтых сто мядзведзяў, за іх можна было купіць усяго толькі 400 грамаў гарэлкі, гэта значыць у дзесяць разоў меней.
Так я зразумеў на практыцы, што такое інфляцыя.
Яшчэ адзін знак старасці
Калі ў гарадскім транспарце ты сядзіш у прысутнасці стаячай жанчыны, ты ўжо не мужчына, ты — старэча.
