Футбалісты чэрвеньскага «Коласа» завяршылі сёлетні чэмпіянат Мінскай вобласці ў першай лізе на дзясятым месцы з чатырнаццаці каманд. У 26 матчах яны атрымалі 9 перамог, тры сустрэчы згулялі ўнічыю і 14 прайгралі. Вынікі выступлення «Коласа» ў чэмпіянаце падводзім разам з трэнерам і варатаром нашай каманды Аляксандрам Курыловічам.
Аляксандр КУРЫЛОВІЧ:
«У НОВЫМ СЕЗОНЕ СПАДЗЯЁМСЯ ЗГУЛЯЦЬ ЛЕПШ»
— Аляксандр Васільевіч, якую адзнаку паставіце камандзе за гэты сезон?
— Мяркую, што згулялі на адзнаку «добра». Прынамсі, каманда выканала задачу мінімум — застацца ў першай лізе — за тры туры да заканчэння чэмпіянату. Так, былі ў нас і прыгожыя гульні, і правальныя. Відавочна, што больш паспяховым атрымалася выступленне «Коласа» ў другім крузе, за які мы набралі 19 ачкоў. Галоўнае, што змагаліся ў кожным матчы да канца. Таму выніковае дзясятае месца расцэньваю як трывалы фундамент для прывабных турнірных перспектыў у новым сезоне.
Дзякуй футбалістам за адданасць камандзе, а балельшчыкам — за падтрымку!
— Каго з ігракоў можна выдзеліць персанальна?
— Заўсёды цяжка на гэтае пытанне адказваць, каб кагосьці не пакрыўдзіць. І усё ж я вылучыў бы Аляксандра Ліпніцкага. Ён правёў за «Колас» шмат матчаў, трывала займаючы месца ў асноўным саставе на правым флангу паўабароны. Без гэтага іграка ўвогуле цяжка ўявіць гульню нашай каманды.
— Наколькі ўзмацнілі «Колас» ігракі, запрошаныя з-за межаў Чэрвеня?
— І мінчане, і смілаўчане нам вельмі дапамаглі. Дзякуй ім! Можна сказаць, што яны ўжо лічаць «Колас» роднай камандай, а Чэрвень — сваім горадам.
— Якую гульню, праведзеную ў сёлетнім чэмпіянаце, можна назваць самай лепшай, а якую — самай горшай?
— Я вылучыў бы па некалькі такіх гульняў. Выдатна правялі стартавы матч другога круга на выездзе са слуцкім «Аграсервісам», які выйгралі — 3:0. Варта ўзгадаць і дзве нашы валявыя перамогі: дома над «Іслаччу-2» (Мінскі раён), калі перамаглі — 3:2, прайграючы — 0:2, і ў Барысаве, дзе, саступаючы мясцовай «ДЮСШ-2» — 0:4, здолелі згуляць унічыю — 4:4. Дарагога каштавала і нічыя — 1:1 — у Дзяржынску з «Лівадыяй-Юні». Мы тады першымі «адабралі» ачкі ў аднаго з лідараў чэмпіянату.
Горшыя гульні? Гэта, безумоўна, паражэнні ў гасцях ад уздзенскай «Беліты-Вітэкс» — 0:8 і дома ад «Жодзіна-2007» — 2:7. А ўвогуле, паражэнне з любым лікам па-свойму крыўднае…
— Што перашкодзіла «Коласу» заняць больш высокае месца ў чэмпіянаце?
— Найперш, няўдалая гульня на старце сезона, калі ў чатырох першых гульнях саступілі сапернікам з аднолькавым мінімальным лікам — 0:1 — і на працягу першых пяці тураў не забілі ніводнага мяча… Гэтыя няўдачы моцна паўплывалі на псіхалагічны стан ігракоў.
— Сюды ж, мне здаецца, варта дадаць праблемы са стабільнасцю стартавага саставу «Коласа»?
— Так, нягледзячы на ўсе намаганні, кадравыя праблемы заставаліся на працягу ўсяго сезона. Напрыклад, калі ў пачатку можна было выбіраць з васьмі абаронцаў, то бліжэй да фінішу чэмпіянату з цяжкасцю ўдавалася сабраць чатырох…Але што тут крыўдаваць на футбалістаў? Не трэба забываць, што ў нас гуляюць не прафесіяналы, а аматары. І ўсе яны жывыя людзі: хтосьці ў дзень гульні працуе, у кагосьці неадкладныя сямейныя праблемы з’яўляюцца. Але кожны ігрок, нават калі яго не было на матчы, шчыра непакоіўся за каманду.
— Хацелася б пагаварыць наконт ролі ў лёсе «Коласа» выхаванцаў чэрвеньскага футбола, якія сёння гуляюць у спаборніцтвах больш высокага ўзроўню… Па вялікаму рахунку і лепшы бамбардзір другой лігі Дзяніс Трапашка з каманды «Смалявічы-СТІ», і Аляксандр Мрынскі з бабруйскай «Белшыны» маглі б дапамагчы землякам, як гэта робіцца ў тых жа уздзенскай «Беліце-Вітэкс», стаўбцоўскім «Нёмане-Агра» ці дзяржынскай «Лівадыі-Юні»…
— Прапановы гэтым ігракам рабіліся, аднак, на жаль, не атрымалася прыцягнуць іх у састаў. Але я не крыўдую, бо разумею, што ў іх і без таго вялікія нагрузкі былі.
Зрэшты, пытанне гэтае застаецца адкрытым, тым больш, што «Коласу» вельмі патрэбны нападаючыя. Таму разлічваю на іх дапамогу ў наступным сезоне. Упэўнены, што, калі б Дзяніс і Саша сёлета ў вольны ад матчаў за свае каманды час гулялі за нас, «Колас» заняў бы больш высокае месца ў чэмпіянаце.
— Прыклад — Яўген Яблонскі — ігрок адной з маладзёжных каманд ФК «БАТЭ»…
— …Так! Вялікі яму дзякуй! Жэня сёлета шмат зрабіў для «Коласа», забіў 12 мячоў. Відавочна, што яго майстэрства ўзрастае. Я шчыра жадаю Яўгену з цягам часу трапіць у асноўны састаў “БАТЭ”.
— На працягу ўсяго сезона ў «Коласе» фактычна не было другога варатара. Але ў перадапошнім матчы чэмпіянату з бярэзінскім «БСЗ» у «рамку» стаў Арцём Аўраменка і паказаў даволі ўпэўненую гульню…
— У Арцёма ёсць добрыя варатарскія здольнасці. Засталося адпрацаваць з ім гульню на выхадах. Хлопец зусім малады, у яго ўсё наперадзе. Сапраўды, сезон аднаму гуляць на варотах цяжка. Гэта пацвердзіў матч у Вілейцы, калі я атрымаў траўму і мы прайгралі з буйным лікам…
— Вядома, што каманды, якія сёлета ўвайшлі ў тройку прызёраў чэмпіянату вобласці, маюць спонсараў, атрымліваюць прэміяльныя за перамогі. Ці не ў гэтым сакрэт іх поспеху?
— Гэта з якога боку паглядзець. Возьмем нашых суседзяў: у «БСЗ» (Беразіно) былі спонсары, але каманда заняла перадапошняе месца і пакінула першую лігу, а ў «Зоркі-ЖКГ» (Мар’іна Горка) спонсараў не было і яны — сёмыя ў выніковай турнірнай табліцы.
Што да «Коласа», то мы таксама гуляем без спонсараў і прэміяльных. Гуляем для сябе і нашых балельшчыкаў. Пра грошы ніхто не задумваецца. Хаця, канешне, спонсар нашай камандзе не пашкодзіў бы. Напрыклад, варта было б неяк матэрыяльна заахвоціць тых жа мінскіх ігракоў, якія за нас выступаюць.
— Скончыўся сезон. Падведзены яго вынікі. Якія планы на сезон новы?
— Больш прадметна пра гэта можна будзе размаўляць бліжэй да наступнай вясны. Мяркую, што абновім састаў. Планы? Думаю, задача-мінімум будзе згуляць лепш, чым сёлета. Задача-максімум — месца ў тройцы прызёраў.
За гэты сезон мы асвоіліся ў першай лізе. І ў некаторых матчах пераканаліся, што можна перамагаць нават вельмі моцнага саперніка.
ВЫНІКОВАЯ ТАБЛІЦА ЧЭМПІЯНАТУ
Каманды Г В Н П М А
«Беліта-Вітэкс» (Узда) 26 21 2 3 93-28 65
«Неман-Агра»
(Стоўбцы) 26 21 2 3 86-42 65
«Лівадыя-Юні»
(Дзяржынск) 26 17 5 4 45-17 56
«Старыя Дарогі» 26 13 4 9 55-43 43
«Вілія» (Вілейка) 26 13 0 13 51-63 39
«Аграсервіс» (Слуцк) 26 11 5 10 51-43 38
«Зорка-ЖКГ» (М.Горка) 26 10 5 11 38-45 35
«Забудова-2007»
(Маладзечна) 26 9 4 13 55-62 31
«Жодзіна-2007» 26 9 3 14 41-45 30
«Колас» (Чэрвень) 26 9 3 14 41-61 30
«Іслач-2» (Мінскі раён) 26 7 7 12 42-49 28
«Клецк» 26 6 3 17 46-69 21
«БСЗ» (Беразіно) 26 5 5 16 45-72 20
«ДЮСШ-2″(Барысаў) 26 6 2 18 54-104 20
Падрыхтаваў Ігар АДАМОВІЧ