АБЛАСНАЯ КАНФЕРЭНЦЫЯ -АДБЫЛАСЯ…
У мінулую пятніцу ў Салігорску адбылася канферэнцыя педагагічных работнікаў Міншчыны па тэме: «Адукацыйныя стратэгіі Мінскай вобласці: інтэлект, творчасць, патрыятызм», якая сабрала каля 700 удзельнікаў. Чэрвеньшчыну на ёй прадстаўляла дэлегацыя складам 35 чалавек.
Як паведаміла намеснік начальніка аддзела адукацыі райвыканкама Анжэла Рымашэўская, напачатку педагогі і госці паўдзельнічалі ў правядзенні майстар-класаў, майстэрняў — педагагічнага росту, педагагічнай і прафарыентацыйнай, інфармацыйнага перакрыжавання, завітаўшы на тры тэматычныя пляцоўкі. Работа там была арганізавана па секцыях — «Стварэнне і творчасць — інтэлект будучага», «Моладзь і навука: крок насустрач», «Разумнікі і разумніцы», «Да вышынь майстэрства», «Камунікатыўнасць і крэатыўнасць — поспех у навучанні замежным мовам», «Дыялог пакаленняў — арыенцір на заўтрашні дзень», «Гадуем патрыётаў Айчыны», «Роля гісторыка-культурных каштоўнасцяў рэгіёна ў грамадзянска-патрыятычным выхаванні», «Прафесійнае самавызначэнне вучняў».
Перад педагагічнай грамадскасцю выступіла начальнік упраўлення адукацыі Мінаблвыканкама Таіса Данілевіч, якая вызначыла асноўныя накірункі дзейнасці ў сістэме адукацыі на новы навучальны год. У рабоце канферэнцыі ўзялі ўдзел старшыня Мінскага абласнога выканаўчага камітэта Барыс Батура і Міністр адукацыі Рэспублікі Беларусь Сяргей Маскевіч.
Падчас форуму ўшаноўвалі маладых спецыялістаў, якія сёлета прыбылі на працу ва ўстановы адукацыі вобласці. Ад нашага раёна на сцэну ўзнімалася настаўніца беларускай мовы і літаратуры, педагог-арганізатар Валевачоўскай СШ Вікторыя Боршч.
Па выніках канферэнцыі яе ўдзельнікам прапанавалі праект рэзалюцыі. Завяршыўся форум канцэртнай праграмай «Той, хто навекі адданы краіне».
… РАЁННАЯ- РЫХТУЕЦЦА
29 жніўня на Чэрвеньшчыне пройдзе традыцыйная жнівеньская канферэнцыя педагагічных работнікаў раёна па тэме: «Патрыятызм, ініцыятыва, інтэлект і творчасць як стратэгія і тактыка развіцця рэгіянальнай сістэмы адукацыі». Адкрыецца яна парадам моладзевых ініцыятыў, які распачнецца на цэнтральнай плошчы Чэрвеня а дзясятай гадзіне раніцы. Працягнецца канферэнцыя пленарным пасяджэннем у раённым цэнтры культуры і адпачынку, а завершыцца канцэртам, падрыхтаваным сіламі выхаванцаў цэнтраў дзіцячай творчасці г.Чэрвеня, г.п.Смілавічы і дашкольных устаноў, вучняў школ раёна.
У фае будзе дэманстравацца выстава дасягненняў творчасці школьнікаў і педагогаў, прымеркаваная да Года кнігі, — кампазіцыі ў выглядзе кніг з розных матэрыялаў. Установы адукацыі прадставяць матэрыялы пра знакамітых ураджэнцаў Чэрвеньскага раёна. Па традыцыі фае цэнтра культуры і адпачынку ўпрыгожаць кветкавыя кампазіцыі. Запланавана арганізацыя выставы хлебабулачных вырабаў.
ПАПОЎНІЛІ ПЕДКАЛЕКТЫВЫ МАЛАДЫЯ СПЕЦЫЯЛІСТЫ
Паводле афіцыйнай інфармацыі, ва ўстановы адукацыі Чэрвеньшчыны павінны былі прыехаць дванаццаць выпускнікоў ВНУ і ССНУ. Але па пэўных прычынах іх колькасць крыху зменшылася.
Як паведамілі ў аддзеле адукацыі райвыканкама, пакуль падчас традыцыйнага жнівеньскага размеркавання вызначаны месцы працы для наступных педагогаў: Вікторыі Боршч (Валевачоўская СШ, педагог-арганізатар, настаўнік беларускай мовы і літаратуры), Васіля Бурцава (СШ №3 г.Чэрвеня, выкладчык фізвыхавання), Марыны Рубанік (Запольская СШ, выкладчык замежнай мовы), Рамана Карасцялёва і Ганны Івановай-Вуціня (Цэнтр дзіцячай творчасці г.Чэрвеня, кіраўнікі гурткоў), Аляксандра Крэня (Цэнтр дзіцячай творчасці г.п.Смілавічы, кіраўнік гуртка), Іны Пашалюк і Наталлі Машкоўскай (Дашкольны цэнтр развіцця дзіцяці г.Чэрвеня, выхавальнікі), Хрысціны Бурданінай (СШ №4 г.Чэрвеня, настаўнік біялогіі).
Але, як паказвае практыка мінулых гадоў, да пачатку новага навучальнага года колькасць маладых спецыялістаў яшчэ можа змяніцца.
Святлана АДАМОВIЧ
