Ураджэнка Чэрвеня Ілона Усовіч заваявала бронзавы медаль у бегу на 400 метраў на чэмпіянаце Еўропы па лёгкай атлетыцы, які прайшоў у сталіцы Фінляндыі Хельсінкі.
У паўфінал наша зямлячка кваліфікавалася з лепшым часам дня — 51.98 секунды, у забегу за выхад у фінал заняла трэцяе месца, а ў фінале саступіла толькі саперніцам са Швецыі і Расіі, фінішаваўшы з часам 51.94 секунды.
— Зразумела, я рада медалю, але не паказанаму часу, — зазначыла Ілона ў экспрэс-інтэрв’ю пасля фінішу. — Тым не менш, задаволена, што перагледзела пасля паўфінала расклад сіл на дыстанцыю. Сёння, калі на фінішную прамую выбегла з віражу ледзь не апошняй — не разгубілася. Адчувала, што ёсць сілы. На шчасце, удалося дагнаць і абагнаць многіх саперніц…
Ілона Усовіч пачынала займацца лёгкай атлетыкай у Чэрвеньскай ДЮСШ (трэнер — Святлана Кур’янчык). Гэта яе другі медаль на спаборніцтвах такога ўзроўню ў індывідуальным бегу. У 2007 годзе Ілона стала сярэбраным прызёрам чэмпіянату Еўропы ў закрытых памяшканнях. Акрамя таго, спартсменка мае тытулы чэмпіёнкі Еўропы-2007, сярэбранага прызёра чэмпіянату Еўропы-2006, сярэбранага прызёра чэмпіянатаў свету-2004 і 2008, бронзавага прызёра чэмпіянату свету-2006 у складзе жаночай эстафетнай зборнай Беларусі 4х400 метраў. Двойчы, у 2004 і 2008 гадах, удзельнічала ў Алімпійскіх гульнях.
На здымку: Ілона Усовіч пасля бронзавага фінішу ў Хельсінкі.
Фота з афіцыйнага сайта Беларускай федэрацыі лёгкай атлетыкі