Падчас раённай акцыі «Здаровая сям’я» журы прызнала лепшай сям’ю Бабічаў з Турца — Васіля, Інэсу, Рамана і Ксюшу. Чаму менавіта іх? Бо гэта сапраўды здаровае жыццярадаснае сямейства, якое мае шмат захапленняў, цікавых заняткаў.
Менавіта яны прадстаўлялі Чэрвеньшчыну на абласным фестывалі-акцыі «Здаровая сям’я» ў Валожыне. Яго арганізатары вырашылі не вызначаць лепшых, таму атрымаўся не конкурс, а сапраўднае свята.
Сям’я Бабічаў прадставіла сябе вялізнай выставай (на здымку). Былі там вышываныя работы, прыгожыя вязаныя рэчы… Гэтымі відамі творчасці захапляецца мама Інэса. Ну, а тата Васіль падтрымлівае і дапамагае: набывае ніткі, рамкі для карцін…
Яшчэ адно вялікае захапленне сямейства — падарожжы. Яны пабылі ўжо ў розных куточках Беларусі, у замках, парках, музеях… З кожнага горада стараюцца прывезці сувеніры, якія таксама дэманстравалі на выставе ў Валожыне. А ўсім жадаючым сямейства дарыла падкоўкі — сімвал шчасця. Усе, хто наведваў «падвор’е» Бабічаў, пісалі ім прыгожыя словы і пажаданні. А на сцэне ўручылі дыплом і памятны падарунак.
Свята атрымалася цікавым, яркім і прыгожым. Яго ўдзельнікі ўбачылі і пачулі шмат новага, карыснага для сябе, прыемна правялі вольны час.
Любоў ВАНЦЕЕВА,
мастацкі кіраўнік
Турэцкага СДК.
Фота аўтара