“Сяльчанка” — гэта першы ў нашым раёне жаночы клуб, створаны напярэдадні новага года па ініцыятыве дэпутата абласнога і раённага Саветаў дэпутатаў, члена прэзідыума рэспубліканскага аб’яднання «Сяльчанка», дырэктара эксперыментальнай базы “Натальеўск” Алены Махнач.
А казку падрыхтавалі мінскія артысты. Тут, у Любішынскім доме культуры, яны знайшлі ўдзячных гледачоў, як маленькіх, так і дарослых. Уваход быў свабодны, без білетаў. Аплату за спектакль выдаткавала эксперыментальная база “Натальеўск”. Так што спяшаліся сюды сем’ямі — з татамі, мамамі, бабулямі… Маленькія дзеткі, падскокваючы, радасна дзяліліся навіной: “Да нас прыехаў Дзед Мароз!” А потым, ва ўсе свае вачаняты з цікавасцю і задавальненнем сачылі за казачнымі дзеяннямі на сцэне. Мюзікл «Цуды тут. Або куды прыехаў Дзед Мароз» заварожваў прыгодамі, спевамі, музыкай…
— Паказаць вясковым дзецям спектакль — гэта толькі першы крок у рабоце нашага грамадскага добраахвотнага аб’яднання, у які першапачаткова ўвайшлі 18 ініцыятыўных, энергічных жанчын. А на мэце шмат добрых спраў. І найпершая — зрабіць больш прыгожым роднае Любішына. “Сяльчанка” будзе таксама дапамагаць вясковым жанчынам у вырашэнні сацыяльных і бытавых праблем, — зазначае Алена Махнач.— Нядаўна я была на пасяджэнні прэзідыума рэспубліканскага аб’яднання “Сяльчанка” і засталася ўражанай той вялікай, разнастайнай работай, якую праводзяць жаночыя аб’яднанні разам з мясцовай уладай у іншых раёнах. Падумалася: а чаму б і ў нас не стварыць штосьці падобнае? У мясцовых жанчын шмат цікавых ідэй, і пры жаданні ёсць магчымасць іх рэалізаваць. Паспрабуем.
Эма МІКУЛЬСКАЯ.
Фота аўтара