Палацава-паркавы комплекс Манюшкаў-Ваньковічаў у Смілавічах прадалі з аўкцыёну за 242 з паловай мільёна рублёў замежнаму таварыству з абмежаванай адказнасцю «Вінктэх-Трэйд», якое спецыялізуецца на продажы камплектуючых для вытворчасці вокнаў і дзвярэй.
Гэты помнік архітэктуры сфармаваўся ў XIX — пачатку XX стагоддзя. У розны час маёнтак Смілавічы належаў Кезгайлам, Сапегам, Завішам. У ХVIII стагоддзі комплекс стаў уладаннем гетмана вялікага літоўскага Міхала Казіміра Агінскага, а ў 1791 годзе адышоў да Манюшкі. Будаўніцтва палаца вялося Станіславам Манюшка (дзедам вядомага кампазітара) і яго сынамі. Казімір Манюшка заклаў багатыя батанічны і фруктовы сады. Узвядзенне комплексу было завершана Лявонціем Ваньковічам.
Стары корпус быў пабудаваны ў пачатку XIX стагоддзя ў стылі псеўдаготыкі. Цяпер ад яго засталіся руіны. У пачатку XX стагоддзя да старога корпусу прыбудавалі новы (у стылі неаготыкі з элементамі стылю «мадэрн»). У склад комплексу ўваходзіць парк, а таксама фрагмент агароджы з брамай.
Прадаўцом на аўкцыёне выступаў Смілавіцкі аграрны каледж. Таргі, якія прайшлі ў Мінску, былі паўторнымі, бо спроба прадаць палацава-паркавы комплекс Манюшкаў-Ваньковічаў з аўкцыёну ў снежні мінулага года аказалася няўдалай. Першапачатковы кошт нерухомай маёмасці тады складаў больш за мільярд рублёў. Гэтым разам ён быў зніжаны на 80 працэнтаў.
Ігар АДАМОВІЧ
