У апошнім матчы першага круга чэмпіянату чэрвеньскі “Колас-Белінвест” згуляў у гасцях з камандай “Старыя Дарогі”.
Гэта было яшчэ тое выпрабаванне! Бо спартыўная зала мясцовай ДЮСШ з-за малых памераў не адпавядае стандартам для правядзення спаборніцтваў падобнага ўзроўню. І нашым ігракам, якія гуляюць у камбінацыйны футбол, цяжка было да яе прыстасавацца. Тым не менш, «Колас-Белінвест» не проста здабыў у Старых Дарогах перамогу, а зрабіў гэта прыгожа і ўпэўнена.
Нашы распячаталі вароты гаспадароў пляцоўкі за шэсць хвілін да перапынку: вызначыўся Аляксандр Варэнік. А потым, не даючы сапернікам апамятацца, Андрэй Філічаў забіў другі мяч.
Гол Максіма Чалядзінскага на 41-й хвіліне сустрэчы зрабіў перавагу «Коласа-Белінвеста» яшчэ больш камфортнай. Да канца матча «Старыя Дарогі» здолелі забіць двойчы, а нашы – тры разы (усе мячы на рахунку Андрэя Філічава).
Такім чынам, Колас-Белінвест» завяршыў першы круг чэмпіянату на першым месцы ў турнірнай табліцы. Другі круг ён пачне 13 лютага гасцявым матчам з «Беразіно». У наступныя выхадныя будзе яшчэ адзін выезд – на сустрэчу з «Бабоўняй», якая прымае сапернікаў у Нясвіжы, дзе зала таксама малых памераў. А ў Чэрвені наша каманда згуляе 26 або 27 лютага са стаўбцоўскім «Кронанам».
«Старыя» Дарогі» – «Колас-Белінвест» (Чэрвень) – 2:6.
5 лютага. Спартыўная зала Старадарожскай ДЮСШ. 20 гледачоў.
“Колас-Белінвест”: Курыловіч, Срыбненка, Бялоў, Чысты, Філічаў, Хадаронак, Чалядзінскі, Варэнік, Стукач, Шмідаў.
Галы ў «Коласа»: Варэнік (24), Філічаў (26, 50, 56, 58), Чалядзінскі (41).
Ігар АДАМОВІЧ
