Пасля першага паўфінальнага матча чэмпіянату Мінскай вобласці ў гасцях з барысаўскай “Гайнай”, які скончыўся перамогай гаспадароў поля 2:1, чэрвеньскі “Колас” падаў пратэст на яго вынік у Федэрацыю футбола Мінскай вобласці.
Сутнасць яго заключалася ў тым, што ў складзе “Гайны” гуляў футбаліст Іван Бутэнас, які сёлета быў уключаны ў афіцыйны пратакол матчу асноўнага складу каманды вышэйшай лігі чэмпіянату Рэспублікі Беларусь “Тарпеда-БЕЛАЗ” (Жодзіна) на гульню з ФК «Славія» (Мазыр). А, паводле “Рэгламенту чэмпіянату Мінскай вобласці па футболу 2020 года”, “ігракі каманд-удзельніц чэмпіянату Рэспублікі Беларусь вышэйшай і першай лігі да гульняў у чэмпіянаце Мінскай вобласці не дапускаюцца”.
Кантрольна-дысцыплінарны камітэт Федэрацыі футбола Мінскай вобласці разгледзеў пратэст і вынес рашэнне: за ўдзел у матчы чэмпіянату Мінскай вобласці Івана Бутэнаса, уключанага ў афіцыйны пратакол на матч вышэйшай лігі чэмпіянату Рэспублікі Беларусь, ануляваць вынік матчу “Гайна” (Барысаў) – “Колас” (Чэрвень) і залічыць камандзе “Гайна” тэхнічнае паражэнне з лікам 0:3.
Такім чынам, у паўторным паўфінальным матчы гэтых каманд, які адбудзецца 22 лістапада ў Чэрвені і пачнецца ў 14 гадзін, “Коласу” для выхаду ў фінал дастаткова перамагчы барысаўчан або згуляць з імі ўнічыю з любым лікам. Чэрвеньцы прадоўжаць барацьбу за чэмпіёнства нават пры паражэнні з лікам 0:1 або 0:2. Пры ліку 0:3 будзе прызначаны дадатковы час, а пры неабходнасці – пасляматчавыя пенальці.
Увага! У сувязі з неспрыяльнай эпідэміялагічнай сітуацыяй балельшчыкі змогуць прайсці на стадыён Чэрвеньскай СДЮШАР толькі праз цэнтральны ўваход. Таксама будзе арганізавана рассадка на трыбунах на бяспечнай адлегласці, пры сабе неабходна мець ахоўныя маскі.