На чарговым пасяджэнні камісіі па справах непаўналетніх упершыню разлядалася такое правапарушэнне, як прысваенне знойдзенай маёмасці.У Кодэксе аб адміністратыўных правапарушэннях Рэспублікі Беларусь пакаранне за яго прадугледжана артыкулам 10.6 у выглядзе штрафу.
Чацвёра непаўналетніх прыцягнуты да адказнасці за парушэнне антыалькагольнага заканадаўства. Агульная сума штрафаў у адносінах да іх склала 7 базавых велічынь. Засмучае тое, што трое з іх – дзяўчыны, дзве з якіх ўжо двойчы былі прыцягнуты за ўжыванне спіртных напояў у грамадскім месцы.
У адносінах аднаго непаўналетняга за здзейснены ім крадзёж з магазіна камісія вынесла папярэджванне, улічваючы сямейную сітуацыю, станоўчую характарыстыку на дзіця і яго асаблівасці.
Двое непаўналетніх упраўлялі транспартным сродкам без адапаведных дакуметаў – правоў. Агульная сума штрафу магла б скласці 40 базавых велічынь (980 рублёў), але камісія абмежавалася мінімумам, таму што непаўналетнія не маюць самастойнага заробку.
Яшчэ 8 бацькоў прыцягнуты да адміністратыўнай адказнасці за неналежнае выкананне бацькоўскага абавязку ў адносінах сваіх дзяцей, якія здзейснілі правапарушэнні.
У трох выпадках — гэта дробны крадзёж з магазіна, беспадстаўны выклік работнікаў аддзела па надзвычайных сітуацыях, разбітае шкло. Падлеткі не могуць быць асабіста прыцягнуты да адказнасці з-за таго, што не дасягнулі ўзросту, з якога яна наступае.
Разглядаліся іншыя справы ў адносінах бацькоў за злоўжыванне імі спіртных напояў і ўхіленні ад выхавання дзяцей. З імі будзе весціся індывідуальная работа ў адпаведнасці з заканадаўствам. Сярод іх ёсць сем’і, якія знаходзяцца на кантролі па Дэкрэту №18. Пакуль ім дадзена магчымасць выправіць сітуацыю ў сям’і. Калі гэтага не адбудзецца, дзеці апынуцца ў сацыяльным прытулку…
Прыемна ўсведамляць, што некаторыя бацькі ўсё ж выпраўляюць становішча ў сям’і і нашы намаганні ў рабоце з імі недарэмныя. Камісіяй прынята рашэнне аб вяртанні дзяцей бацькам. Гэта дзве поўныя сям’і. У адным выпадку дваіх дзяцей вярнулі да мамы і таты. Яны ўхілілі ўсе прычыны, якія сталі падставай да адабрання дзяцей. У другім выпадку – дзіця вернута толькі бацьку, таму што маці не знайшла ў сабе сілы адмовіцца ад ужывання спіртных напояў. А бацька працуе, прайшоў курс лячэння ад алкагольнай залежнасці, выконвае ўсе рэкамендацыі ўрачоў і падагогаў.
У адносінах да яе будзе падрыхтавана іскавая заява ў суд аб пазбаўленнні бацькоўскіх правоў.
Наталля СЦЯЖКО,
намеснік старшыні камісіі
па справах непаўналетніх
Чэрвенскага райвыканкама