У Чэрвеньскім лясгасе прайшлі раённыя спаборніцтвы вальшчыкаў лесу «Лесаруб-2014», у якіх узялі ўдзел 14 прадстаўнікоў гэтай прафесіі з усіх лясніцтваў.
Канкурсанты дэманстравалі сваё майстэрства ў валцы дрэў, замене ланцуга бензапілы, распілоўцы бервяна камбінаваным рэзам і дакладнай распілоўцы, а таксама — абрэзцы сукоў макета дрэва.
Кампетэнтнае журы ацэньвала выкананне пералічаных аперацый па мноству адмысловых параметраў. У прыватнасці, пры спілоўванні дрэва звярталася ўвага на накірунак яго валкі, дакладнасць прапілоўвання, падпілоўвання. На абрэзцы сукоў важнымі былі не толькі хуткасць «праходжання дыстанцыі», але і якасныя паказчыкі: за кожны звышнарматыўны выступ або пашкоджанне ствала налічваліся штрафныя балы. А вось падчас замены ланцуга бензапілы хуткасць мела вырашальную ролю. Што да распілоўкі бервяна, то тут, не ўдаючыся ў падрабязнасці крытэрыяў ацэнкі, як відавочца выкажу ўласнае ўражанне: каб бездакорна ўсё выканаць, трэба надзвычай дасканала валодаць «інструментам»…
Пераадолеўшы ўсе этапы спаборніцтваў, лесарубы прыйшлі на фініш з пэўным багажом балаў, якія і вызначылі месца кожнага ў «турнірнай табліцы». Уручэнне Дыпломаў і грашовых прэмій пачалося з узнагароджання пераможцаў кожнага этапу. Першае месца па валцы дрэва заняў Дзмітрый Горгун (Валмянскае лясніцтва), які, дарэчы, у дзень спаборніцтваў адзначаў дзень нараджэння. Лепшым у дакладнай распілоўцы бервяна стаў Сяргей Анішчонак (Грабянецкае доследна-вытворчае лясніцтва). У астатніх трох намінацыях не было роўных неаднаразоваму прызёру раённых і ўдзельніку абласных спаборніцтваў вальшчыкаў лесу Аляксандру Зянькевічу з Хутарскага лясніцтва. Ён таксама стаў пераможцам у агульным заліку, апярэдзіўшы Дзмітрыя Горгуна з Валмянскага лясніцтва і Сяргея Молчана з Іванаўскага лясніцтва, якія занялі другое і трэцяе месцы, адпаведна.
— Адна з галоўных мэтаў спаборніцтва — яшчэ раз праверыць, наколькі дакладна нашы вальшчыкі ведаюць і выконваюць патрабаванні тэхнікі бяспекі пры рабоце з бензапілою. Конкурсныя заданні складзены менавіта з улікам гэтага, — зазначыў галоўны інжынер Чэрвеньскага лясгаса Аляксандр Калько. — Ну і, канешне ж, вызначылі мацнейшых канкурсантаў, якія, спадзяюся, пасля дадатковых трэніровак годна прадставяць раён на абласных спаборніцтвах.
Ігар АДАМОВІЧ.
Фота аўтара