Пад такой назвай прайшло пасяджэнне клуба «Маладзёжнае перакрыжаванне», які дзейнічае пры нашай бібліятэцы.
Удзел у ім узялі вучні дзявятых класаў СШ №4 г.Чэрвеня, класны кіраўнік Ларыса Мікалаеўна Няборская, бібліятэкары і нашы госці — загадчыца аддзялення сацыяльнай адаптацыі і рэабілітацыі тэрытарыяльнага цэнтра сацыяльнага абслугоўвання насельніцтва Святлана Кароль і псіхолаг гэтай жа ўстановы Святлана Аношка.
Псіхолаг пазнаёміла школьнікаў з рознымі прафесіямі — прэстыжнымі (менеджэры, юрысты, фінансісты і г.д.), небяспечнымі (лётчык-выпрабавальнік, аператыўнік, пажарны), рэдкімі (тытэстар, пастыжор, самелье). Апошнімі ўдзельнікі сустрэчы зацікавіліся найбольш.
Тытэстар — чалавек, які вызначае гатунак і якасць чаю, дэгустатар чаю. Такіх спецыялістаў яшчэ называюць чайнымі самелье. Яны складаюць калекцыі чаю з розных яго гатункаў.
Пастыжор — чалавек, які вырабляе парыкі, шыньёны ці накладныя прычоскі са штучных альбо натуральных валасоў. Гэта даволі папулярная прафесія, да таго ж, адна з самых патрэбных у тэатральных колах. Ды і пры стварэнні кінафільмаў пастыжор адыгрывае не апошнюю ролю. Тут, апрача парыкоў, ён вырабляе накладныя бароды, вусы, бакенбарды.
Самелье — работнік рэстарана, адказны за набыццё, захаванне вінаў і прапанову іх кліентам. Ён складае вінную карту, займаецца дэгустацыяй вінаў і дае парады па выбары напояў наведвальнікам рэстарана.
Увогуле, у міжнародным стандарце класіфікацый прафесій існуе іх 10.333.
Таксама Святлана Аношка правяла анкетаванне, прапанавала школьнікам даведацца, якія прафесіі падыходзяць ім па знаку Задыяка. А Святлана Кароль распавяла пра работу тэрытарыяльнага цэнтра сацыяльнага абслугоўвання насельніцтва, дзе працуе тэлефон даверу, па якому ўсіх уважліва выслухаюць, дапамогуць справіцца з праблемамі, паверыць у сябе, дадуць добрую і патрэбную параду. Нумар тэлефона — 5-07-30, час працы — панядзелак-пятніца, з 8.00 да 13.00 і з 14.00 да 17.00.
Напрыканцы сустрэчы бібліятэкары правялі тэст «Якая прафесія табе падыходзіць?»
Наталля МАЛАНКА,
бібліятэкар аддзела бібліятэчнага маркетынгу Чэрвеньскай цэнтральнай раённай бібліятэкі.
Фота Святланы ЖДАНОВІЧ