Штогод 15 лютага мы прыгадваем вайну ў Афганістане. Трое хлопцаў-прызыўнікоў з Раванічаў у свой час трапілі туды, у гарачую «кропку». Дзякуй Богу, вярнуліся… І яшчэ задоўга да вываду савецкіх войскаў мы падчас мерапрыемстваў да 23 лютага звычайна ўшаноўвалі воінаў-«афганцаў» і іх родных.
Двое з тых, хто ўдзельнічаў у баявых дзеяннях у Афганістане, пасля выехалі з Раванічаў. Таму сёлета на мерапрыемства, прымеркаванае да Дня памяці воінаў-інтэрнацыяналістаў, у сельвыканкам завітаў толькі адзін — вадзіцель ААТ «Раванічы» Андрэй Гоман з жонкай.
Яму шчыра жадалі здароўя, дабрабыту, поспехаў у працы, мірнага неба над галавой. Старшыня сельвыканкама Вольга Тарасік, прадстаўнік прафкама мясцовай гаспадаркі Надзея Давыдоўская ўручылі Андрэю Гоману сувенір і матэрыяльную дапамогу. А ўдзельнікі мастацкай самадзейнасці сельскага Дома культуры падаравалі кветкі і песню. Наш аднавясковец сардэчна дзякаваў за ўвагу.
Спадзяёмся, што ў гэты дзень, калі ўсіх воінаў-інтэрнацыяналістаў асабліва непакояць успаміны, мы хаця б крыху адцягнулі ўвагу Андрэя ад цяжкіх думак. Няхай ніколі больш не паўторыцца такая вайна…
Тамара ЛАДУЦЬКА,
мастацкі кіраўнік Раваніцкага сельскага Дома культуры.
