У падтрымку кандыдата ў Прэзідэнты Рэспублікі Беларусь Аляксандра Лукашэнкі выйшлі ў панядзелак прадстаўнікі раённай арганізацыі ветэранаў вайны і працы. Яны арганізавалі пікет ля магазіна «Малахіт» у Чэрвені. Сонечна, весела было побач з гэтымі сталымі людзьмі, а яшчэ ўзнёсла і ўрачыста, нібы на ранейшай святочнай дэманстрацыі.
— Мы ўжо другі раз выходзім з пікетам на вуліцы Чэрвеня, — гаворыць старшыня арганізацыі Іван Ладуцька. — Перш за ўсё мы хочам прызваць жыхароў, нашых землякоў прыйсці на выбары і аддаць свой голас у падтрымку аднаго з кандыдатаў.
У гэты дзень побач са сваім лідэрам былі: Аляксандра Раманькова, Аляксей Федарэнчык, Эдуард Дулеба, Мікалай Мурашка, Валерый Тукай, Мікалай Крук, які спецыяльна, каб падтрымаць таварышаў, прыехаў з вёскі Залессе.
— Асабіста мы падтрымліваем Аляксандра Лукашэнку,- гаворыць Мікалай Мурашка, старшыня пярвічнай ветэранскай арганізацыі ПМК-8. — Пад кожным пунктам яго праграмы гатовы падпісацца. Падабаецца, што гэтыя пункты альбо пачынаюцца, альбо закончваюцца канкрэтнымі мерамі. Хопіць агульных абяцанкаў. Ёсць слушныя прапановы і ў іншых кандыдатаў, але яны альбо паўтараюць прапановы Лукашэнкі, альбо патрабуюць доўгага часу выканання без гарантыі добрага выніку.
— Мы верым у беларускі народ, у тое, што ён зробіць правільны выбар, — аднагалосна падвялі вынік размовы ветэраны.
Галіна Гамеза. Фота аўтара
