У другім туры чэмпіянату Мінскай вобласці нашы футбалісты выправіліся на выезд не ў аптымальным саставе. Адсюль вынікала лагічная задача: найперш надзейна згуляць у абароне. Аднак чэрвеньцы са стартавым свістком пайшлі наперад.
Гэтая акалічнасць, відавочна, заспела знянацку гаспадароў пляцоўкі новага фізкультурна-спартыўнага комплексу «Брыз», які быў урачыста адкрыты ва Уздзе менш за два месяцы таму. Прынамсі, доўгі час яны не маглі ўзяць мяч пад кантроль, раз-пораз у простых сітуацыях упускаючы яго ў аўт.
«Колас» меў некалькі рэальных шанцаў адкрыць лік у сустрэчы, але ў выніку гэта зрабілі уздзенцы, злавіўшы нашых на контратацы. Чэрвеньцы здолелі адыграцца амаль адразу ж пасля перапынку: намаганні партнёраў па камандзе трапным ударам завяршыў Аляксей Баранаў.
Бліжэй да сярэдзіны другога тайма нагадала пра сябе кароткая лаўка запасных у «Коласа». Адчувалася, што хлопцам цяжка падтрымліваць высокі тэмп гульні. «Узда», дзякуючы колькаснай перавазе ў іграках для замены, «прыціснула» нашых да варот. Урэшце малады галкіпер «Коласа» Адрыян Мурашка, які ў цэлым выдатна правёў матч, прапусціў другі мяч.
Да заканчэння гульні было яшчэ каля дзесяці хвілін. У такой сітуацыі нашым нічога не заставалася, як з рызыкай для ўласных варот атакаваць максімальна вялікімі сіламі. І гэта спрацавала. На 56-й хвіліне Аляксей Баранаў з глыбіні пляцоўкі на вялікай хуткасці ўварваўся ў валоданні «Узды» і выйграў дуэль у галкіпера – 2:2.
Незадоўга да фінальнай сірэны ў матчы надарыўся эпізод са спрэчным рашэннем арбітра. Падчас атакі на нашыя вароты на паркеце апынуўся Адрыян Мурашка. Чэрвеньцы ў гэты момант перахапілі мяч і маглі выходзіць утраіх супраць аднаго саперніка. Аднак суддзя спыніў гульню, каб даць магчымасць падняцца нашаму галкіперу.
Перамога была блізка. Але і нічыю ў цяжкай для нашых кадравай сітуацыі варта занесці ім у актыў.
У суботу, 2 снежня, «Колас» згуляе ў Чэрвені матч трэцяга тура чэмпіянату з капыльскай «Бабоўняй». Пачатак сустрэчы – у 15 гадзін.
Ігар АДАМОВІЧ
“Узда” – “Колас” (Чэрвень) – 2:2.
25 лістапада. Узда. Фізкультурна-аздараўленчы комплекс “Брыз”. 70 гледачоў.
“Колас”: Мурашка, Курбанаў, Будрыцоў, Весялоў, Баранаў, Хурсік, Барбоцька.
Галы ў «Коласа»: Баранаў (32, 56).
