Заключны матч першага круга чэмпіянату Беларусі сярод каманд другой лігі чэрвеньскі “Колас” гуляў на выездзе з “Фалько”.
Прычым выезд гэты атрымаўся не такім ужо і блізкім. Каманда з Дзяржынскага раёна сёлета праводзіць хатнія гульні не на родным стадыёне ў Чаркасах пад Мінскам, і нават не на “Весце” ў Дзяржынску, а ажно ў Стоўбцах.
У пачатку сустрэчы стала вядомым, што мар’інагорская “Вікторыя” даволі нечакана саступіла ў гасцях “Адзінству” (Дзяржынск) – 0:3. І гэта абвострыла барацьбу за лідарства ў зоне “Поўнач”.
Першая палова гульні праходзіла ў роўнай барацьбе. Ігракі “Коласа” добра гулялі на флангах, але не хапала дакладных перадач у штрафную пляцоўку, якія маглі б стаць выніковымі. Надараліся ў чэрвеньцаў і памылкі ў абароне, з-за чаго ўзнікалі вострыя моманты ля нашых варот. У некаторых эпізодах на нашым баку была фартуна, але ў большасці выпадкаў, і не толькі ў першым тайме, бліскуча гуляў малады галкіпер “Коласа” Раман Андрэенка, для якога матч з “Фалько” стаў дэбютным.
У другім тайме гульнявой ініцыятывай валодалі гаспадары поля. Футбалістам “Коласа” даводзілася больш дбаць пра абарону, чым пра атаку, адсюль і мінімальная колькасць шанцаў паразіць вароты саперніка. У цэлым жа было відавочным, што ў шэрагу нашых ігракоў гульня, як кажуць, не пайшла. А яшчэ, на мой суб’ектыўны погляд, адчувалася адсутнасць у складзе “Коласа” двух вопытных ключавых ігракоў – Дзмітрыя Асіпенкі і Мікалая Івашкіна. Не дапамаглі выправіць сітуацыю і замены. У выніку не прапусцілі, але і забіць не атрымалася.
Нягледзячы на тое, што перамогі ў гульні з “Фалько”, на якую разлічвалі трэнерскі штаб і ігракі нашай каманды, дасягнуць не ўдалося, “Колас” завяршыў першы круг чэмпіянату на першым месцы ў турнірнай табліцы з адрывам у адно ачко ад бліжэйшых пераследвальнікаў.
Адметна, што чэрвеньцы адзіныя ў зоне “Поўнач” не прайгралі ніводнага матча. А яшчэ яны маюць найменшую колькасць прапушчаных мячоў – адзін.
У бліжэйшыя выхадныя “Колас” пачне другі круг спаборніцтваў гасцявым матчам з “Беразіно”.
Ігар АДАМОВІЧ
“Фалько” (Дзяржынскі раён) – “Колас” (Чэрвень) – 0:0.
24 чэрвеня. Стоўбцы. Стадыён “Юнацтва”. 80 гледачоў.
“Колас”: Андрэенка, Кірэеў (Галюк, 46), Цярэшка (Весялоў, 78), Вінцукоўскі, Грыб, Паляшчук, Чыжэўскі (Чысты, 78), Рубін, Шадурка, Сёмкін (Васюк, 65), Хадневіч (Клімовіч, 78).