Ноччу 12 сакавіка на вуліцы Кастрычніцкай у Чэрвені загарэўся гандлёвы павільён “Табакерка”, які належыць сумеснаму закрытаму акцыянернаму таварыству “Энерга-Ойл”.
У выніку пажару пашкоджаны сцены, дах і маёмасць будынка, а таксама часткова – дах размешчанага побач аўтобуснага прыпынку.
Як паведамілі “Раённаму весніку” у Чэрвеньскім раённым аддзеле па надзвычайных сітуацыях, прычына пажару высвятляецца. Разглядаецца версія падпалу.
Гэта ўжо другі за апошнія чатыры месяцы выпадак загарання “Табакерак” у Чэрвені. У лістападзе мінулага года такі ж павільён пашкоджаны ў выніку пажару на вуліцы Карла Маркса каля гарадскога рынку.
Фота прадастаўлена Чэрвеньскім РАНС
