Гаспадаркі Чэрвеньшчыны завяршаюць касьбу траў першага ўкосу

Аграрный сектор Актуальное

Паводле звестак райсельгасхарчу на раніцу ўчарашняга дня, гэты від работ выкананы па раёну на 13135 гектарах, што складае 90 працэнтаў ад плана. З траў першага ўкосу назапасілі 46 працэнтаў сенажу і 40 працэнтаў сена ад неабходнай іх гадавой патрэбы.

У сельскагаспадарчым вытворчым філіяле “Аграбуд” адкрытага акцыянернага таварыства “Мінскжалезабетон” гэтымі днямі ўбіраюць апошнія гектары скошаных траў. Першы ўкос выдаўся тут ураджайным. З яго нарыхтавалі 5347 тон сенажу (71 працэнт гадавой патрэбы) і 216 тон сена (48 працэнтаў). Сельгаспрадпрыемства мае лепшую ў раёне забяспечанасць кармамі ў разліку на ўмоўную галаву жывёлы – 11,24 цэнтнера кармавой адзінкі. Гэта на чатыры цэнтнеры кармавой адзінкі больш, чым было на такі ж час летась.

Вопытны механізатар Вячаслаў Койпіш гэтымі днямі ўбірае травы на сена рулонным прэс-падборшчыкам ПП-1450 “Спадар”. Гэтую тэхніку гаспадарка атрымала для абкаткі з Беларускай машынавыпрабавальнай станцыі. Яе адметная асаблівасць – высокая шчыльнасць намоткі рулонаў, што спрашчае ўмовы іх адвозкі і захоўвання.

– Стварэнню трывалай кармавой базы спрыяе тое, што мы кожны год падсяваем значныя аб’ёмы шматгадовых траў, – распавёў галоўны аграном гаспадаркі Леанард Мельнік. – У прыватнасці, летась падсеялі іх 375 гектараў. Гэта пераважна бабова-злакавыя сумесі – люцэрна, канюшына, цімафееўка. Шмат увагі надаём і догляду за сенажацямі. Кармавыя палеткі атрымліваюць дастатковыя дозы калійных і азотных угнаенняў…

Адразу два віды работ паспявае выконваць на сенажаці механізатар Уладзімір Бусянкоў. Пасля варушэння і зграбання сена ў валкі граблямі, ён убірае яго ў рулоны прэс-падборшчыкам.

Ігар АДАМОВІЧ.
Фота аўтара



Добавить комментарий

Ваш e-mail не будет опубликован. Обязательные поля помечены *