Сёння ў спартыўным комплексе «Ігумен» Чэрвеньскай СДЮШАР стартаваў баскетбольны турнір у праграме Рэспубліканскай спартакіяды школьнікаў-2019 сярод юнакоў 2004-2005 гадоў нараджэння. Удзел у ім бяруць каманды ўсіх абласцей і Мінска.
Першымі на пляцоўку выйшлі юныя баскетбалісты Магілёўшчыны і Гомельшчыны. Магіляўчане былі мацнейшымі — 82:60. У другім матчы мінчане ўчынілі разгром камандзе Віцебскай вобласці — 126:13.
Затым адбылося ўрачыстае адкрыццё спаборніцтваў. Спартсменаў прывітала намеснік старшыні Чэрвеньскага райвыканкама Ала Шахоцька. Эстрадныя нумары выканалі для гасцей выхаванцы Цэнтра творчасці дзяцей і моладзі г.п.Смілавічы — салісткі Аляксандра Гулевіч, Аліса Несцярок і танцавальная група «Іскрынкі».
Першы гульнявы дзень завяршыўся матчам паміж камандамі Гродзенскай і Мінскай абласцей.
Спаборніцтвы працягнуцца да пятніцы. У аўторак, сераду і чацвер гульні пачынаюцца ў 11.00, 12.30 і 14.00, у пятніцу — у 10.00, 11.30 і 13.00. А з другой паловы дня пятніцы да наступнага аўторка ў СК «Ігумен» такі ж баскетбольны турнір пройдзе ў дзяўчат.
Ігар АДАМОВІЧ. Фота аўтара
