На чарговым пасяджэнні камісіі па справах непаўналетніх райвыканкама абмеркавалі пытанне «Аб рабоце па прафілактыцы супрацьпраўных дзеянняў ва ўстановах адукацыі «Чэрвеньскі прафесійны будаўнічы ліцэй», «Смілавіцкі сельскагаспадарчы ліцэй» і «Смілавіцкі аграрны дзяржаўны каледж».
Папярэдне па патрабаванню Мінскага аблвыканкама быў даследаваны стан злачыннасці сярод непаўналетніх. Рост злачыннасці мае месца ў 15 раёнах, Чэрвеньскі ў іх лік не ўваходзіць. Амаль кожнае другое злачынства здзейснена навучэнцамі ПТВ. Даследаванне выявіла наступнае: за 9 месяцаў 2014 года непаўналетнімі і з іх удзелам у раёне здзейснена 8 злачынстваў (2013 г.- 10). У тым ліку 7 непаўналетнімі, з іх 4 на пачатак кастрычніка сталі паўналетнімі. За парушэнне антыалкагольнага заканадаўства затрымана 39 непаўналетніх: 23 — навучэнцы Чэрвеньскага прафесійнага ліцэя, 2 — беспрацоўныя, 1 — працуе, 1 — навучэнец СШ №2 г.п.Смілавічы, 2 — навучэнцы Смілавіцкага ліцэя, 9 — навучэнцы ўстаноў адукацыі іншых раёнаў. Таксама засведчана, што ва ўстановах адукацыі работа па прафілактыцы сямейнай нядобранадзейнасці вядзецца недастаткова.
За 8 месяцаў са Смілавіцкага ліцэя адлічаны 16 непаўналетніх: 1 — на падставе прыгавору суда, 1 — па прычыне пераводу ў іншую навучальную ўстанову, 1 — у сувязі з працаўладкаваннем, 13 — па асабістаму жаданню, яны знаходзяцца на ўтрыманні бацькоў. У Чэрвеньскім ліцэі адлічана 4 непаўналетніх, адзін з іх сірата, што недапушчальна.
У ліцэях і каледжы выхаваўчая работа вядзецца ў адпаведнасці з планамі, маюцца праграмы па фарміраванні здаровага ладу жыцця, прафілактыцы ВІЧ-інфекцыі, алкагалізму, наркаманіі, ужывання псіхаактыўных рэчываў, выкананне якіх прадугледжвае ўзаемадзеянне ўсіх суб’ектаў выхаваўчага працэсу. Працуюць саветы па прафілактыцы безнагляднасці і правапарушэнняў сярод непаўналетніх. Аднак, як адзначыла старшыня камісіі па справах непаўналетніх Ала Шахоцька, планы работы з цяжкімі падлеткамі неканкрэтныя. Не ўлічваюцца асаблівасці кожнага: узяты ён на ўлік за ўгон транспарту, або за п’янства, ці за што іншае. Па яе словах, трэба запланаваць правядзенне з кожным канкрэтных мерапрыемстваў, такіх, каб палепшыць яго становішча ў сям’і, прычым абмеркаваць і ўзгадніць іх з бацькамі. А пасля, выканаўшы запланаванае, мы павінны зразумець, што ва ўсведамленні дзіцяці памянялася. Іншы раз гутаркі з імі і бацькамі не даюць ніякіх вынікаў. Таму неабходна выкарыстоўваць іншыя меры ўздзеяння: ліст у працоўны калектыў, або тэлефанаванне кіраўніку ўстановы, дзе працуюць бацькі, з просьбай аб садзейнічанні сям’і і школе ў выхаванні. Не дапамагае — далучаць праваахоўныя органы, выкарыстоўваць увесь комплекс адміністрацыйных мер.
— Права прызнаць умовы выхавання дзіцяці ў сям’і сацыяльна небяспечнымі мае Савет прафілактыкі навучальнай установы, — сказала намеснік старшыні камісіі па справах непаўналетніх Наталля Сцяжко, — а таксама і канстатаваць факт таго, што дзіцяці неабходна дзяржаўная ахова. У гэтым выпадку дзіця забіраюць з сям’і. Іншы раз даводзіцца ісці і на такія меры. Мы павінны працаваць у імя захавання жыцця і здароўя дзіцяці.
Камісія прыняла рашэнне, у якім прадпісаны меры па ўдасканаленню работы па прафілактыцы супрацьпраўных дзеянняў навучэнцаў, таксама разгледзела матэрыялы ў адносінах бацькоў, якія не выконваюць свае абавязкі па выхаванню дзяцей і непаўналетніх, якія здзейснілі правапарушэнні. Да іх прыняты адпаведныя меры спагнання.
Таццяна МАРЦЬЯНАВА