У «Эксперыментальную базу «Натальеўск» завіталі намеснік старшыні грамадскай арганізацыі «Беларускі Саюз Жанчын» Рэгіна Давідовіч, якая ўзначальвае аддзяленне «Сяльчанка» гэтай арганізацыі, і старшыня абкама прафсаюзаў АПК Мінскай вобласці Андрэй Някрэвіч. У «Натальеўску» дзейнічае адна з 20 рэспубліканскіх пярвічак «Сяльчанка». Узначальвае яе Алена Махнач.
Тут працуе 45 % жанчын ад агульнай колькасці работнікаў. Яны задзейнічаны амаль на ўсіх участках вытворчасці. Рэгіна Давідовіч сустрэлася з загадчыцай зернесушыльнага комплексу Марынай Кудланс. Яна выказала ёй словы падзякі і ўручыла падарунак ад Саюза жанчын
Значную ролю на жніве адыгрываюць работнікі кухні. Аб гэтым гаварыў старшыня абкама прафсаюзаў АПК Мінскай вобласці Андрэй Някрэвіч. Ён падзякаваў за работу і ўручыў падарунак повару гаспадаркі Ларысе Клачковай (на здымку).
— Сёлета на ўборачнай Ларысе з яе памочнікамі даводзілася гатаваць па 105 порцый на абед і на вячэру. Старалася, каб стравы былі смачнейшымі, з зелянінай, вітамінамі, — гаворыць Андрэй Някрэвіч.
— У пытаннях арганізацыі харчавання ў Натальеўску сітуацыя адметная, — падтрымлівае гаворку старшыня райкама прафсаюзаў АПК Тамара Сакалоўская:
— Побач са сталовай на плошчы 2 га засеяны цэлы агарод з усялякай зелянінай і агароднінай. Тут цыбуля, часнок, укроп, салата, агуркі, памідоры, буракі, морква, капуста. Гэта значна знізіла сабекошт харчавання. У сталоўцы не толькі смачна гатуюць, але і робяць нарыхтоўкі на зіму. Ларыса з памочнікамі закрылі 105 трохлітровых слоікаў агуркоў і капусты для харчавання працаўнікоў гаспадаркі восенню і наступнай вясной падчас пасяўной кампаніі. Вось такая тылавая надзейнасць.
Падчас знаёмства з гаспадаркай і ў размовах з мясцовымі жанчынамі госці распавялі аб сумесных акцыях рэспубліканскага камітэта прафсаюза работнікаў АПК, аддзялення “Сялянка” па услаўленню жанчын на сёлетнім жніве.
Паліна Польская.
