Вечарам пятніцы каманда «Будаўнік» (Чэрвень), створаная на базе аднайменнага калектыву і мінскай «SQ.by-BELFIZA», адматаўшы больш за тры з паловай сотні кіламетраў на мікрааўтобусе, дабралася да Пінска. Тут, у спартыўным комплексе Палескага дзяржаўнага ўніверсітэта, ужо ўсё было гатова да ўрачыстага адкрыцця чацвёртага тура ХХ чэмпіянату Рэспублікі Беларусь па футзале.
Сёлета ў красавіку сталіца беларускага Палесся прыме матчы групавога раунду Чэмпіянату свету па гэтаму віду спорту. Таму тур рэспубліканскіх спаборніцтваў стаў своеасаблівай рэпетыцыяй усіх службаў да гэтай адметнай падзеі, пачынаючы з грунтоўнага дагляду сумак супрацоўнікамі міліцыі, да дублявання па-англійску ўсіх паведамленняў дыктара.
Сама ўрачыстая цырымонія атрымалася даволі змястоўнай: парад каманд, выступленні прадстаўнікоў уладаў горада і федэрацыі футзала, прадстаўленне Кубка Еўропы, які зборная Беларусі заваявала летась, канцэртныя нумары. А затым быў першы матч — паміж «Будаўніком» і гомельскім «БелГУТам».
Нашы пасля доўгай дарогі цяжка ўваходзілі ў гульню. Гамяльчане абралі тактыку «ад абароны», таму «Будаўніку» працяглы час не ўдавалася распячатаць іх вароты. Але на 11-й хвіліне трапны ўдар Аляксандра Тарлікоўскага ўсе ж дасягнуў мэты — 1:0. Ён жа на 7-й хвіліне другога тайма выдатна прабіў штрафны і прынёс нашай камандзе перамогу — 2:0.
Праз гульню «Будаўнік» чакала яшчэ больш складанае выпрабаванне — матч з гаспадарамі пляцоўкі. Пры аглушальнай падтрымцы сваіх балельшчыкаў «Аіст» выйграў першы тайм — 1:0, а адразу ж пасля перапынку замацаваў перавагу — 2:0. Нашы футбалісты здолелі хутка адквітаць адзін мяч: вызначыўся Дзмітрый Чысты. Аднак гэта, на жаль, не прынесла «Будаўніку» пералому ў гульні. Пінчукі забілі нам яшчэ тройчы, а гол Антона Масько на апошняй хвіліне сустрэчы толькі крыху падсаладзіў горыч паражэння — 2:5.
На раніцу «Будаўніку» давялося трымаць экзамен перад лідарам чэмпіянату — «Брэстутарчарметам», які сёлета не прайграў у спаборніцтвах ніводнага матча. Хуткі гол, які ўжо на 5-й хвіліне забіў Дзмітрый Чысты, абнадзеіў нашых. Але не больш таго. Вопытныя і майстравітыя футбалісты з Брэста паступова але ўпэўнена ўзялі ніткі гульні ў свае рукі і ў выніку атрымалі пераканаўчую перамогу — 6:1.
Тым не менш, чацвёрты тур не пагоршыў шанцаў «Будаўніка» на ўваходжанне ў тройку прызёраў чэмпіянату. У гэтым можна пераканацца, зазірнуўшы ў турнірную табліцу спаборніцтваў.
Ігар АДАМОВІЧ.
Фота аўтара
На здымках:
«Будаўнік» падчас цырымоніі ўрачыстага адкрыцця тура; момант матча «Будаўнік» — «Брэстутарчармет».
Вынікі астатніх матчаў тура:
«Брэстутарчармет» — «Бабруйск» — 6:3, «БелГУТ» — «Аіст» — 4:7, «ВРЗ» — «Бабруйск» — 5:2, «Бабруйск» — «БелГУТ» — 5:3, «Аіст» — «ВРЗ» — 1:3, «Брэстутарчармет» — «ВРЗ» — 6:2, «Аіст» — «Бабруйск» — 12:1.
Турнірная табліца чэмпіянату пасля трох тураў
| Каманда | Г | В | Н | П | М | А |
| «Брэстутарчармет»(Брэст) | 11 | 11 | 0 | 0 | 51:10 | 33 |
| «ВРЗ» (Гомель) | 10 | 7 | 0 | 3 | 29:19 | 21 |
| «Аіст» (Пінск) | 11 | 5 | 0 | 6 | 45:34 | 15 |
| «Будаўнік»(Чэрвень) | 10 | 4 | 1 | 5 | 18:27 | 13 |
| «Бабруйск»(Бабруйск) | 11 | 4 | 1 | 6 | 36:45 | 13 |
| «БелГУТ»(Гомель) | 11 | 1 | 0 | 10 | 19:53 | 3 |
