Больш за 45 гадоў у маім сямейным альбоме захоўваецца вось гэты фотаздымак. На ім — мужчынская частка тагачаснага вялікага педагагічнага калектыву СШ №1 г.Чэрвеня.
Чым ён цікавы? Па-першае, зірніце, шаноўныя сябры, колькі ў 1965-ым годзе ў школе было настаўнікаў-мужчын! Наўрад ці зараз хаця б у адной установе адукацыі Чэрвеньшчыны знойдзецца столькі… Па-другое, здымак зроблены акурат у мужчынскае свята. І практычна кожны трымае ў руках падарунак. Дарэчы, першы справа ў першым радзе — наш знакаміты зямляк, кіраўнік Натальеўскага хору Іван Архіпавіч Няборскі. Яму і падарунак адпаведны, бачыце? Дудка, хаця і цацачная… А вунь хтосьці з машынкай стаіць, у кагосьці — мядзведзік у руках…
Але самае цікавае — па-трэцяе… Менавіта гэты фотаздымак атрымала ў падарунак кожная жанчына-педагог… на свята 8 Сакавіка! Сведчанне таму — памятны надпіс на адваротным баку.
А яшчэ на свята 8 Сакавіка мужчыны ладзілі для нас вясёлы канцэрт з пераапрананнямі. Сапраўды, умелі раней не толькі працаваць, але і адпачываць.
Таццяна Сяргееўна Федарэнчык, колішняя настаўніца СШ №1 г. Чэрвеня