У гэтым сельгаспрадпрыемстве на ўчарашнюю раніцу пасеялі ўжо 237 гектараў зерневых, або 32,9 працэнта адведзеных пад іх палеткаў. Напярэдадні да яго далучылі суседняе сельгаспрадпрыемства «Новая Ніва». Аднак, як распавёў «Раённаму весніку» дырэктар «Гануты-Агра» Яўген Мурашка, дадатковыя рботы не перашкодзілі мясцовым земляробам не толькі першымі сярод гаспадарак Чэрвеньшчыны пачаць яравую сяўбу, але і стаць яе лідарамі.
— Старт пасяўной далі ў мінулую пятніцу, калі механізатар Андрэй Сівуха засеяў аўсом першыя дзесяць гектараў на палетку ля вёскі Новая Ніва, — гаворыць ён. — У суботу пасеялі ўжо 20 гектараў зерневых, у нядзелю — 40. З панядзелка выйшлі на 50-55 гектараў штодня. Тэхнічныя магчымасці дазваляюць нам сёння сеяць за дзень не менш, чым па сто гектараў. Але, на жаль, з-за няўстойлівага надвор’я шмат на якіх палетках працаваць пакуль што проста немагчыма.
Зразумела, клопатаў зараз пабольшала. Але кожны ў нашым вялікім калектыве ўсвядоміў: аб’ём работ павялічыўся, а значыць, з’явілася магчымасць больш грошай зарабіць…
Сёлета ў сельгаспрадпрыемстве «Ганута-Агра» разлічваюць атрымаць ў сярэднім з гектара не менш чым па 35 цэнтнераў збожжа. На гэта нацэлены кожны, хто працуе тут на ўраджай. Новы галоўны аграном гаспадаркі Ларыса Зенькевіч, якая прыйшла сюды з такой самай пасады ў «Новай Ніве», у гэтыя дні асабліва пільна сочыць за тым, каб не парушалася тэхналогія сяўбы:
— Якаснае насенне павінна легчы ў якасна падрыхтаваную, шчодра запраўленую ўгнаеннямі глебу, — зазначае яна.
…З добры настроем і надзеяй на ўмалотны колас пачаў сёлетнюю веснавую сяўбу на трактары МТЗ-3022 з камбінаваным пасяўным агрэгатам вытворчасці айчыннага прадпрыемства «Лідааграпраммаш» механізатар Мікалай Няхай (на здымку). Вопытны хлебароб усцешаны тым, што апошнім часам паляпшаецца тэхнічная ўзброенасць гаспадаркі. Прычым не толькі колькасна, але і якасна.
— У маім новым трактары — камфортная кабіна, — гаворыць ён. — Пыл у яе не праходзіць, у спёку выратоўвае кандыцыянер. А электроніка заўсёды падкажа, прасігналізуе, калі раптам дзе няспраўнасць якая… Глебу пачалі араць абаротнымі плугамі, сеяць — пасяўным агрэгатам, дык і палеткі нашмат лепш выглядаюць. Дасць бог, паўсюль навядзём на іх парадак!
Ігар АДАМОВІЧ. Фота аўтара
Паводле звестак райсельгасхарчу на раніцу ўчарашняга дня, у раёне пасеялі 1033 гектары яравых зерневых — 10,4 працэнта ад неабходнага.
