Неўзабаве ў земляробаў наступіць тая гарачая пара, пра якую кажуць: адзін дзень год корміць. Ад таго, наколькі якасна сумеюць падрыхтавацца яны да пасяўной і зладжана правесці яе, у многім залежыць будучы ўраджай.
А тэрміны прыспешваюць. Спецыялісты раяць пачынаць работу ў полі, як толькі верхні слой глебы прагрэецца да плюс пяці градусаў. Канешне, нельга марудзіць, каб паспець захапіць вільгаць у глебе. Пра тое, як падрыхтаваліся да веснавой сяўбы ў ААТ “Валевачы”, распавядае дырэктар гаспадаркі Пётр МАЛАХАЎ:
— Пад ураджай сёлетняга года мы плануем пасеяць 1170 гектараў ранніх зерневых, 900 — кукурузы (з іх 150 гектараў на зерне), 470 гектараў аднагадовых траў. Насеннем мы забяспечаны поўнасцю. Закуплена 40 тон эліты ячменю і яравой пшаніцы. На 65 працэнтаў забяспечаны мінеральнымі ўгнаеннямі, а да пачатку палявых работ набудзем і астатнюю колькасць. Спраўляемся з планам вывазкі арганікі. Пры плане 32 тысячы тоны ўжо ўнесена яе 35 тысяч. Тэхніка падрыхтавана на 100 працэнтаў. У поле выйдуць 20 трактароў. З іх чатыры — энерганасычаныя. Для правядзення сяўбы ў гаспадарцы створаны комплексны тэхналагічны атрад. Распрацаваны аплата працы, умовы спаборніцтва. Ёсць нормы выпрацоўкі і заданні для механізатараў на ўвесь светлавы дзень. Вынікі работы будзем падводзіць штодзённа з налічэннем заработнай платы і адлюстраваннем на экране спаборніцтва. Рабочы дзень у нас пачаўся ўжо з шасці гадзін раніцы. Прадумана таксама арганізацыя гарачага харчавання людзей — два разы на дзень.
Словам, у гаспадарцы робіцца ўсё магчымае, каб у аптымальныя тэрміны справіцца з пастаўленай задачай. У прыватнасці, плануем правесці закрыццё вільгаці за 12 каляндарных дзён, падкарміць 1500 гектараў азімых за 7 дзён, пасеяць яравыя зерневыя і зернебабовыя за 12-14 каляндарных дзён…
Цяпер у нас праводзяцца работы па ўнясенню хлорыстага калію. У прыватнасці, гэтым займаецца механізатар Іван Савічаў (на здымку). Ён унёс ужо ўгнаенні на плошчы ў 600 гектараў.
У пасяўную дробязяў не існуе. Бо дзень прамаруджвання вясной можа абярнуцца значнай затрымкай на ўборцы. Наколькі трывалы падмурак будучаму ўраджаю створаць у ААТ “Валевачы”, пакажуць вынікі жніва.
Эма МІКУЛЬСКАЯ.
Фота аўтара