21 мая. Чэрвень. Стадыён СДЮШАР. Сонечна. 18 градусаў. 100 гледачоў.
“Колас”: Аўраменка (Курыловіч, 83), Весялоў, Ліневіч (Шмідаў, 66), Палтаржыцкі, Сацкоў (Аруцюнян, 83), Чысты (Ліпніцкі, 57), Блінец, Качаргін (Афаневіч, 46), Краўчук (Шафераў, 46), Сувораў (Фофанаў, 70), Мрынскі.
Галы ў “Коласа”: Мрынскі (28 – з пенальці, 31 – з пенальці, 65), Афаневіч (90).
Доўгачаканае футбольнае свята, якім традыцыйна лічыцца пачатак сезону, завітала ў нядзелю ў Чэрвень. Адданыя заўзятары “Коласа” апладысментамі сустракалі нашу каманду, якая выйшла на поле ў новай жоўта-чорнай форме. Усе адразу прыкмецілі, што цяперашнія яе колеры ўдала сімвалізуюць даўні занятак ігуменцаў – пчалярства.
Адметнасці старту сёлетняга сезона надаваў і ўнушальны заявачны спіс “Коласа” на сезон – 37 ігракоў. Такога не было нават у пазамінулы чэмпіёнскі год! І менавіта па гэтай прычыне ў пратакол на матч, які абмяжоўваецца васямнаццаццю прозвішчамі, не ўсім удалося прабіцца.
Паколькі ў саставе чэрвеньцаў з’явіўся шэраг новых футбалістаў, можна было прагназаваць, што наша каманда не адразу пачне зладжаную гульню. Так і сталася. Амаль паўгадзіны спатрэбілася ігракам, каб больш-менш наладзіць гульнявыя сувязі і прыглядзецца да саперніка.
Магчыма, працэс адаптацыі зацягнуўся б і на больш працяглы час, калі б не прысутнасць Аляксандра Мрынскага, які, згуляўшы напярэдадні ў Асіповічах за пінскую “Хвалю”, заехаў дахаты і не прамінуў падтрымаць каманду роднага горада.
Таленавіты нападаючы разам з партнёрами, якія дапамагалі дакладнымі перадачамі, у традыцыйнай для сябе манеры кружыў галовы абаронцам барысаўчан, вырабляючы фінты непасрэдна ў штрафной пляцоўцы. У двух момантах яго здолелі спыніць толькі з парушэннем правілаў. І абодва пенальці рэалізаваў сам Аляксандр. Трэці гол таксама забіў ён. Гэтым разам – з гульні.
Бліжэй да заканчэння сустрэчы камфортная галявая перавага нашых і адпаведны ёй лагодны настрой ледзь не абярнулася для іх непрыемнасцямі. Госці правялі дзве выніковыя контратакі, скараціўшы разрыў у ліку да мінімальнага за пяць хвілін да заканчэння сустрэчы.
Дзякуй Богу, перад самым фінальным свістком Павел Афаневіч з перадачы Аляксандра Мрынскага паставіў пераможную кропку ў гульні – 4:2.
У гэтую суботу “Колас” чакае паездка ў Салігорск на матч з сярэбраным прызёрам мінулагодняга чэмпіянату вобласці “Хімікам-Беларуськаліем.
Вынікі астатніх матчаў 1 тура: ФК “Лагойск” – ФК “Беразіно” – 3:0, “Лівадыя-Юні” (Дзяржынск) – “Нёман-ДЮСШ” (Стоўбцы) – 5:1, ФК “Нясвіж” – “Хімік-Беларуськалій” (Салігорск) – 0:1, “Фалько” (Дзяржынскі раён) – ФК “Старыя Дарогі” – 0:0.
КАЛЯНДАР ГУЛЬНЯЎ “КОЛАСА” (першы круг)
27 мая (субота)
“Хімік –Беларуськалій” (Салігорск) – “Колас”
4 чэрвеня (нядзеля)
“Колас” – “Нёман-ДЮСШ” (Стоўбцы)
10 чэрвеня (субота)
ФК “Беразіно” – “Колас”
18 чэрвеня (нядзеля)
“Колас” – “Фалько” (Дзяржынскі раён)
25 чэрвеня (нядзеля)
ФК “Лагойск” – “Колас”
1 ліпеня (субота)
“Колас” – “Лівадыя-Юні” (Дзяржынск)
8 ліпеня (субота)
ФК “Нясвіж” – “Колас”
16 ліпеня (нядзеля)
“Колас” — ФК “Старыя Дарогі”
Ігар АДАМОВІЧ. Фота аўтара