У жніўні споўніцца дваццаць пяць гадоў, як Вольга Якаўлеўна Фурс прыйшла працаваць ў аддзяленне сацыяльнай дапамогі на даму ДУ «Чэрвеньскі тэрытарыяльны цэнтр сацыяльнага абслугоўвання насельніцтва» сацыяльным работнікам.
— Мая зона абслугоўвання — вёскі Камісарскі Сад і Калодзежы, — распавяла Вольга Якаўлеўна. — Абслугоўваю восем чалавек. Штодня — дваіх. У нас ёсць пералік паслуг, якія сацыяльны работнік павінен выконваць. У прыватнасці, дастаўка паліва, вады, уборка ў памяшканні раз на тыдзень, пакупкі ў магазіне і аптэцы, дапамога ў падтрыманні асабістай гігіены. Але па просьбе кліентаў і штосьці іншае даводзіцца рабіць. Калі хварэюць нашы падапечныя, то і есці зварыць. Клопатаў хапае.
Любоў Васільеўна Холад з вёскі Калодзежы вельмі задаволена працай сацыяльнага работніка:
— Наша Волечка — выдатны чалавек і выдатны работнік. Усе мы, каго яна абслугоўвае, любім яе і паважаем. Добрасумленная і чулая, працавітая і ўважлівая, карыстаецца заслужанай павагай. Чакаем яе з нецярпеннем.
Жыве Вольга Якаўлеўна ў Любішына. Калі надвор’е дазваляе, дабіраецца ў свае вёскі на веласіпедзе. Узімку — на аўтобусе, а дадому, як прыйдзецца. Бывае, што і пехатою. А гэта адлегласць у адзінаццаць кіламетраў толькі ў адзін бок. Ніколі не лічыцца з асабістым часам. Усё, што неабходна зрабіць для людзей, — зробіць, чым дапамагчы — дапаможа.
У дваццаць гадоў яна пераехала разам з мужам і маленькай дачушкай Кацяй з забруджанага радыяцыяй Хойнікскага раёна Гомельскай вобласці на Чэрвеньшчыну, якая стала для сям’і Фурс другой радзімай. Прыжыліся тут. Муж Аляксандр працуе ў ДЭУ-121 вадзіцелем. Сына Аляксандра ў маі чакаюць з тэрміновай службы ў войсках Міністэрства ўнутраных спраў. Дачка Каця замужам, ёсць чатырохгадовая ўнучка Ксюша.
Раней займалася вязаннем, шыццём. Зараз увесь час аддае рабоце і хатнім справам.
Рашэннем райвыканкама па выніках работы за 2016 год Вольга Якаўлеўна Фурс прызнана лепшым работнікам сацыяльнай сферы. Яе фотаздымак змешчаны на раённай Дошцы гонару.
Таццяна МАРЦЬЯНАВА. Фота аўтара