У няпростых сённяшніх умовах, калі існуе вялікая канкурэнцыя з боку прадпрымальнікаў, вельмі цяжка выжываць раённаму камбінату бытавога абслугоўвання з невысокімі цэнамі на свае паслугі. Аб тым, якія меры прымаюць тут для ўдасканалення гэтай службы, распавядае дырэктар КУП
«Чэрвеньскі РКБА» Дзмітрый Палянскі:
— На гэтай пасадзе я працую пяць месяцаў. У калектыве трыццаць дзевяць чалавек. Засталіся самыя адданыя. Акрамя ўжо існуючых паслуг: цырульня, рамонт абутку, рытуальныя паслугі, пашыў адзення, кліенты ўпадабалі атракцыёны. З дапамогай Чэрвеньскага райвыканкама наш камбінат набыў атракцыён «Батут» , мініяцюрныя гоначныя машынкі. У святочныя і выхадныя дні гэтыя віды карыстаюцца папулярнасцю.
А для клапатлівых гаспадынь добрай навіной стала тое, што мы ўзнавілі такую паслугу, як чыстка падушак, дакладней — пер’я. У спецыяльнай машыне адбываецца поўная чыстка пяра ад усялякіх забруджванняў і паразітаў. Па жаданню кліента можам пашыць насыпку. Каштуе гэта, ну зусім смешна — сямнаццаць тысяч рублёў за кілаграм пер’я. Такую паслугу можна атрымаць толькі ў Чэрвені. Але ў любым населеным пункце, дзе ёсць пункт прыёму заказаў камбіната бытавога абслугоўвання, можна падаць заяўку. Мы прыедзем, прымем заказ і ў азначаны тэрмін вернем. Такіх пунктаў па раёну дзевяць — Любішына, Хутар, Красны Дар, Раванічы, Рудня, Чарнаградзь, Заполле, Турэц, Вайнілава. Тут аказваюць таксама цырульныя паслугі. У продажы ёсць мыючыя і чысцячыя сродкі, яны таннейшыя, чым у гандлёвых кропках.
Прапануем паслугі па абкосу травы, грузаперавозкі, можам пераараць агарод. Калі ў вёсцы няма нашага пункту, звярніцеся па тэлефону -54535.
Значная падзея для нас — адкрыццё цырульні ў гарадскім пасёлку Смілавічы. Знаходзіцца яна ў памяшканні былога кінатэатра. Увогуле, наконт Смілавіч, у нас ёсць пэўныя планы па адраджэнню тут былых бытавых паслуг.
Канешне, у першую чаргу, мы дбаем пра малазабяспечаных грамадзян, цэны на нашыя паслугі найбольш прымальныя для гэтых людзей. І якасць іх — на ўзроўні.
Занатавала
Паліна Польская
