У адпаведнасці з Дэкрэтам №3 Прэзідэнта Рэспублікі Беларусь А.Р.Лукашэнка “Аб прадухіленні сацыяльнага ўтрымальніцтва», апошні тэрмін пастаноўкі на ўлік у якасці беспрацоўнага ў аддзелах занятасці скончыўся 2 ліпеня 2015 года для тых, хто не працаваў з пачатку года. Патрэбна, каб у беспрацоўнага было не менш, чым 183 працоўныя каляндарныя дні. Усе, хто паспеў гэта зрабіць , пазбегнуць сёлета выплаты збору. У далейшым, калі беспрацоўны двойчы адмовіцца ад прапанаванай яму работы без уважлівых прычын, ён будзе зняты з уліку. Беспрацоўным, згодна Закону аб занятасці можна быць толькі тры гады.
Аб тым, якая склалася абстаноўка з беспрацоўем у раёне, карэспандэнту газеты распавядае начальнік аддзела занятасці ўпраўлення па працы, занятасці і сацыяльнай абароне Чэрвеньскага райвыканкама Уладзімір Уладзіміравіч Сянько:
— У нашым раёне на пачатак года ў аддзеле занятасці стаяла на ўліку 82 беспрацоўныя. У чэрвені — 135. З іх па ўзроставай шкале больш за ўсё людзі ад 50 да 52 гадоў, потым — ад 45 да 49 гадоў, пасля- ад 40 да 44 гадоў. Ёсць людзі з вышэйшай адукацыяй — 13 чалавек, з іх 7 жанчын; з сярэдне- спецыяльнай — 18, 9 жанчын; з прафесійна-тэхнічнай — 37, 18 жанчын.
Вакансій на 1 ліпеня ў нашым аддзеле заяўлена 130. З іх 42 — медыцынскія работнікі, 34 работнікаў гатовы прыняць на працу лясгас, 17 спецыялістаў патрэбна раённай ветстанцыі, 15 запрашае раённае спажывецкае таварыства, 15 чакаюць на прадпрыемствах сельскай гаспадаркі, астатнія 7- рабочыя масавых прафесій на прадпрыемствы г. Чэрвеня, але з агаворкай — са спецыяльнай падрыхтоўкай. Каб дапамагчы нашым грамадзянам знайсці работу,аддзел занятасці прапануе курсы перападрыхтоўкі па розных спецыяльнасцях. У верасні будзем набіраць групы электрагазазваршчыкаў, вадзіцеляў, цырульнікаў. А ўвогуле, існуе банк вакансій, які можна знайсці ў інтэрнеце на сайтах Міністэрства працы і сацыяльнай абароны, аблвыканкама і райвыканкама, у профільных газетах.
У сувязі з гэтым хочацца засцерагчы грамадзян ад махляроў, якія выкладваюць аб’явы аб аказанні паслуг па працаўладкаванню, альбо дадатковым заробку. Спакусіўшыся магчымасцю знайсці работу з высокім акладам, беспрацоўны ахвотна купляе «тавар». Калі выясняецца , што вакансія занята, а грошы патрачаны ўпустую, вярнуць іх ужо нельга.
Таксама гэта тычыцца аб’яў аб падпрацоўцы на даму. Спачатку просяць заплаціць азначанную суму за перасылку матэрыялаў, а потым бясследна знікаюць.
Напамінаем: любы непрацуючы можа знайсці патрэбную інфармацыю ў адкрытых выданнях бясплатна. Напрыклад, на названых сайтах, альбо у нас, у аддзеле занятасці.
— Уладзімір Уладзіміравіч, па даных статыстыкі у нашым раёне пражывае 18 221 чалавек працаздольнага ўзросту, а ў эканоміцы раёна занята 12 786. Як вы лічыце, дзе знаходзяцца астатнія амаль 6 000 чалавек?
— У гэтую лічбу ўваходзяць людзі, якія знаходзяцца ў дэкрэтным водпуску па догляду дзіцяці, інвалідаў, прэстарэлых. Тут таксама работнікі, якія працуюць за мяжой, на прадпрыемствах горада Мінска, іншых гарадоў- нашых суседзяў. На жаль, у нашым раёне адсутнічаюць буйныя прадпрыемствы. Чэрвеньскі аддзел занятасці не можа прадаставіць месца працы ўсім , хто мае ў гэтым патрэбу.
— А ці ўсе непрацуючыя маюць права на атрыманне дапамогі па беспрацоўю? Якую суму яна складае?
— Не ўсе. У Законе аб занятасці ёсць поўны пералік тых катэгорый, якія маюць права. На першага ліпеня 2015 года сярэдні памер дапамогі па беспрацоўю складае 241 464 рублі.
— Ці лічыцца ўважлівай прычына, калі ёсць месца работы, але наймальнік не жадае прымаць накіраванага аддзелам чалавека?
— Не, не лічыцца. Такі факт гаворыць аб тым, што канкрэтны чалавек ужо меў месца работы, але страціў яго ў выніку парушэнняў дысціпліны, як правіла неаднаразовых. Праводзім прафілактычную размову з такім работнікам , спадзяёмся, што чалавек усвядоміў — паблажак больш не будзе, жыццё становіцца жорсткім, вялікая канкурэнцыя. Дапамагаем знайсці месца. Цяпер ўсё будзе залежыць толькі ад яго.
— Што можа чакаць чалавека з вышэйшай адукацыяй, калі сярод прапаноў няма спецыяльнасці яго профілю?
— Першыя паўгода яму будуць падбіраць і прапаноўваць спецыяльнасці па дыплому, потым роднасныя, магчыма ў другім рэгіёне, калі чалавек згодзен на пераезд, магчыма перападрыхтоўку.
— У такім выпадку, што вы параіце старшакласнікам, якія выбіраюць будучую прафесію, вызначаюцца з навучальнай установай?
— Абавязкова ўлічваць патрэбы рынку працы, свядома прадстаўляць якія спецыяльнасці будуць запатрабаваныя ў бліжэйшым будучым, каб не застацца без работы.
— Дзякуй за размову.
Паліна Польская. Фота аўтара
