Жыхары раёна маюць магчымасць пастаянна звяртацца са сваімі пытаннямі да мясцовай улады. Так, два разы на месяц вядзе прыём грамадзян асабіста старшыня райвыканкама Іван Пятровіч Муха, адзін раз — з выездам у населены пункт раёна.
Штотыднёва праводзяць прыёмы і прамыя тэлефонныя лініі начальнікі аддзелаў райвыканкама і служб раёна.
Звароты грамадзян знаходзяцца на кантролі раённага выканаўчага камітэта. Іх стараюцца вырашаць аператыўна. Тыя, што патрабуюць дадатковых матэрыяльных укладанняў, — па меры паступлення фінасавання.
Таму, напэўна, падчас «прамой тэлефоннай лініі», якая адбылася ў мінулую суботу са старшынёй райвыканкама, тэлефанаванняў да яго было няшмат. Звароты тычыліся рамонту водаправода, вулічнага асвятлення на вёсцы, рамонту дома, некаторых іншых пытанняў добраўпарадкавання.
А вось жыхароў дамоў па вуліцы Чапаева ў Чэрвені каля рэстарана «Волма» усхвалявала парушэнне спакою па вечарах, калі падлеткі забаўляюцца піратэхнічнымі вырабамі. Страляніна пад вокнамі не даспадобы пажылым людзям.
Іван Пятровіч даручыў адпаведным службам дакладна разабрацца ў кожнай сітуацыі і дапамагчы тым, хто звяртаўся па дапамогу. На сённяшні дзень адно з пытанняў па рамонту водаправода ўжо вырашана.
Таццяна МАРЦЬЯНАВА
