Смілавіцкім валёнкам — падтрымка дзяржавы
Бюджэтную пазыку ў памеры 3 мільярды рублёў на папаўненне абаротных сродкаў атрымае бліжэйшым часам адзінае ў Беларусі і адно з нешматлікіх у СНД прадпрыемства па вытворчасці валёнак — Смілавіцкая валяльна-лямцавая фабрыка. Адпаведную пастанову прыняў урад краіны.
Як паведамляе інтэрнэт-партал TUT.BY, умовай аказання дзяржпадтрымкі з’яўляецца выкананне фабрыкай у 2014 годзе даведзеных ва ўстаноўленым парадку паказчыкаў па тэмпах росту прадукцыйнасці працы і рэнтабельнасці продажу.
У мінулым годзе на фабрыцы ад рэалізаванай прадукцыі атрымалі больш за 19 мільярдаў рублёў выручкі. Чысты прыбытак склаў 957 мільёнаў рублёў.
Вытворчыя магутнасці прадпрыемства дазваляюць вырабляць да 250 тысяч пар валёнак у год. Патрэба ў сыравіне, асноўнымі пастаўшчыкамі якой з’яўляюцца Туркменістан, Узбекістан і Таджыкістан — 500 тон.