Іван Пятровіч МУХА, старшыня Чэрвеньскага раённага выканаўчага камітэта:
— З думкамі добрымі і прыўзнятым настроем. Нягледзячы на тое, што апошнія гады для раёна былі складанымі з-за ўздзеяння эканамічнага крызісу, усё ж Чэрвеньшчына захавала свой народна-гаспадарчы комплекс, працоўныя месцы, калектывы і сацыяльную стабільнасць. Гэта садзейнічала таму, што па выніках года і пяцігодкі ў цэлым выкананы сем з дзесяці важнейшых параметраў, прадугледжаных Праграмай сацыяльна-эканамічнага развіцця на 2006-2010 гады. Шмат зроблена ў розных сферах дзейнасці, добраўпарадкоўваюцца вуліцы Чэрвеня і вёсак, будуюцца прыгожыя аграгарадкі, раён папаўняецца маладымі кадрамі, якім ствараюцца належныя ўмовы для жыцця.
На наступную пяцігодку перад нашымі працаўнікамі пастаўлены яшчэ больш напружаныя задачы. 2011 год аб»яўлены годам эфектыўнай працы. І менавіта ад таго, наколькі ў кожным працоўным калектыве будуць распрацаваны меры для эфектыўнага механізма гаспадарання, актыўна будзе праводзіцца тэхнічная перааснашчанасць гаспадарак пад канкурэнтназдольную вытворчасць, а дзяржаўныя датацыі на развіццё аграпрамысловага комплексу будуць прыносіць адпаведную аддачу, напрамую залежыць развіццё сацыяльнай сферы, рост заработнай платы і дабрабыт вяскоўцаў. Дарэчы, на павышэнне якасці іх жыцця асаблівую ўвагу сканцэнтроўвалі выступаючыя на нядаўна адбыўшымся сходзе дэлегатаў чацвёртага Усенароднага сходу ад Мінскай вобласці.
У панядзелак і аўторак наша дэлегацыя ад Чэрвеньшчыны ў складзе 8 чалавек будзе прымаць удзел у IV Усебеларускім народным сходзе. Усе прадстаўнікі — людзі адказныя і дастойныя. Яны змогуць граматна і даступна данесці да працоўных калектываў задачы, якія будуць пастаўлены перад краінай на наступную пяцігодку.
… А яшчэ — прыўзняты настрой надае выпаўшы снег. Ён нібы падводзіць рысу ўсяму зробленаму і настройвае на наступныя Калядныя і Навагоднія святы.