Аня Новік яшчэ толькі вучыцца правільна трымаць у руках скрыпачку і асвойвае нотную грамату. Але міне час і, мачыма, будзе віртуёзна іграць на інструменце, як і яе выкладчыца Святлана Усеваладаўна Кузьміч. Дзяўчынцы гэтага вельмі хочацца.
Мінулая пятніца для Ані і яшчэ 49 першакласнікаў музычнага аддзялення Чэрвеньскай школы мастацтваў была асаблівай і хвалюючай. Іх, навічкоў, пасвячалі ў музыканты. Урачысты вечар сабраў не толькі выхаванцаў і выкладчыкаў аддзялення, але і бацькоў, сяброў першакласнікаў. Артыстычна вяла праграму Святлана Усеваладаўна, дарэчы, яна паказала і ўласнае цудоўнае майстэрства ігры на скрыпцы. Музычная п’еса гучала надта прыгожа, кранаючы ў слухачоў самыя патаемныя струны душы. Выдатна саліраваў на баяне і малады педагог, выпускнік Чэрвеньскай школы мастацтваў Аляксандр Правасуд.
Пра кожны інструмент навічкам не толькі распавядалі вершамі. Cтарэйшыя выхаванцы прадэманстравалі, чаму навучыліся самі за час вучобы — ігралі на баяне, акардыёне, фартэпіяна, флейце, цымбалах, гітары… Суправаджалі ігру юных музыкантаў канцэртмайстары Любоў Яўгенаўна Доліч і Галіна Мікалаеўна Прышывалка.
Каб больш актыўна задзейнічаць у святочным вечары гледачоў, ім прапанавалі музычныя загадкі і гульні. А напрыканцы першакласнікам падарылі памятныя медалі, якія прыгожа зрабіла з паперы выкладчыца Вераніка Уладзіміраўна Грышкевіч. У падрыхтоўцы ўрачыстасці прымалі ўдзел таксама выкладчыкі Алена Віктараўна Ліхадзіеўская і Святлана Міхайлаўна Дзімохіна.
Пасвячэнне ў музыканты — гэта ўжо традыцыя ў Чэрвеньскай школе мастацтваў. Ёй рады і дзеці, і дарослыя. З хваляваннем чакаюць юныя музыканты, з замілаваннем назіраюць за выступленнем дараванняў бацькі. Як зазначыла выкладчык Святлана Усеваладаўна Кузьміч, апошнім часам у дзяцей павысілася цікавасць да музычных інструментаў. Напрыклад, сёлета навучыцца іграць на скрыпцы пажадалі 11 дзяўчынак і хлопчыкаў.
Эма МІКУЛЬСКАЯ.
Фота аўтара