30 мая і 5 чэрвеня на сцэне Рэспубліканскага Палаца культуры ў Мінску адбудзецца прэм’ера лірыка-камедыйнай оперы выбітнога кампазітара, ураджэнца Ігуменшчыны Станіслава Манюшкі «Verbum Nobile» («Слова гонару»).
Як паведамляе інфармацыйнае агенцтва БЕЛТА, сусветная прэм’ера оперы адбылася ў 1861 годзе ў Варшаве, дзе ў той перыяд жыў і працаваў Станіслаў Манюшка. Вытанчаны камедыйны сюжэт і яркасць музычных вобразаў прынеслі спектаклю поспех і паставілі оперу ў шэраг лепшых твораў кампазітара.
Першую спробу ажыццявіць пастаноўку ў Беларусі распачаў Камерны музычны тэатр «Галерэя» пры садзейнічанні Музычнага дома «Класіка». Адмыслова для беларускай прэм’еры оперы пераклад для камернага складу аркестра стварыў дырыжор-пастаноўшчык Іван Касцяхін. Жывы гумар і займальныя сюжэтныя калізіі польскага лібрэта Яна Хенцыньскага знайшлі сваё адлюстраванне ў беларускім перакладзе Дар’і Вашкевіч. Рэжысёрская версія Алены Медзяковой прадставіць жанр класічнай камернай оперы ў арыгінальным сучасным ключы.
Пасля сталічных прэм’ер, спектакль 20 чэрвеня пакажуць у Гродна на старэйшай тэатральнай сцэне Беларусі, адкрытай больш за два стагоддзі таму мецэнатам Антоніем Тызенгаузам (цяпер гэта Гродзенскі абласны тэатр лялек).
Ігар АДАМОВІЧ
