Не першы раз на цэнтральнай плошчы пасёлка Смілавічы жыхары бачаць машыну з каляровай рэкламай аб вялікай карысці для нашага здароўя агародніны. І кожны раз ля яе збіраецца вялікая чарга людзей. Не дзіва гэта! 18 мая з машыны прадавалі агуркі па цане 9500 рублёў за кілаграм, а памідоры — па 18500 рублёў. Значна танней, чым ва ўсіх смілавіцкіх крамах. Сапраўдная канкурэнцыя. Якасць — выдатная. Маленькія пупырчатыя зялёныя агуркі, чырвоныя памідоры — вачэй не адарваць. І на смак выдатныя: сам з сябрамі каштаваў.
Дбае аб смілаўчанах Ніна Вікенцьеўна Жалязнова. Яна кіруе ў Смалявіцкім раёне гаспадаркай, якая вырошчвае гародніну ў адкрытым і закрытым грунце. Вось і накіроўвае яна машыну з вельмі патрэбным таварам для стала смілаўчан. Доўгі час працавала Ніна Вікенцьеўна ў вёсцы Шасціснопы, Смілавіцкім ліцэі, таму і не забывае сваіх землякоў.
Шаноўная Ніна Вікенцьеўна! Усе жыхары смілавіцкага рэгіёна шчыра дзякуюць Вам за клопат. Жадаюць далейшага поспеху. Мяркуюць, нядрэнна было б адкрыць пастаянны гандаль гароднінай у Смілавічах.
Іван ЯРАШЭВІЧ,
г.п. Смілавічы